Nagpur News : वाशीम जिल्ह्यातील गोंदेगाव ग्रामपंचायतीत उपसरपंच पदासाठी १४ एप्रिल रोजी होणाऱ्या निवडणुकीचे निकाल जाहीर करण्यास मुंबई उच्च न्यायालयाच्या नागपूर खंडपीठाने अंतरिम स्थगिती दिली आहे.

तसेच, या प्रकरणात कोर्टाने अमरावतीच्या अतिरिक्त विभागीय आयुक्त, वाशिमच्या जिल्हाधिकारी यांच्यासह इतर प्रतिवादींना नोटीस बजावत ५ मेपर्यंत उत्तर दाखल करण्याचे आदेश दिले आहेत. ग्रामपंचायत सदस्य वैभव ऐकाडे यांनी नागपूर खंडपीठात ही याचिका दाखल केली आहे.

या प्रकरणावर न्यायमूर्ती अनिल पानसरे यांच्या समक्ष सुनावणी झाली. याचिकेनुसार, ४ जानेवारी २०२३ रोजी गोंदेगाव ग्रामपंचायतीत उपसरपंच पदाची निवडणूक झाली होती, ज्यात याचिकाकर्ता वैभव ऐकाडे विजयी झाले होते आणि लक्ष्मी ऐकाडे पराजित झाल्या होत्या.

ही निवडणूक प्रक्रिया कायदेशीर आणि व्यवस्थित पद्धतीने झाली नाही, असा आरोप करत लक्ष्मी ऐकाडे यांनी जिल्हाधिकाऱ्यांकडे तक्रार केली. वाशिमच्या जिल्हाधिकाऱ्यांनी १० मार्च २०२४ रोजी निवडणूक सभा रद्द करण्याचा आदेश पारित केला.

त्या आदेशाविरोधात वैभव ऐकाडे यांनी विभागीय आयुक्त, अमरावती यांच्या कार्यालयात अपील दाखल केली. हे अपील विभागीय आयुक्त, अमरावती यांनी २६ डिसेंबर २०२४ रोजी फेटाळून लावले. या आदेशाला याचिकाकर्त्याने नागपूर खंडपीठात आव्हान दिले.

दरम्यान, वाशीम जिल्हाधिकाऱ्यांनी ३० मार्च २०२५ रोजी गोंदेगाव ग्रामपंचायतीच्या उपसरपंच पदासाठी १४ एप्रिल २०२५ रोजी निवडणूक घ्यावी, असा आदेश जारी केला. त्याविरोधातही वैभव ऐकाडे यांनी उच्च न्यायालयात धाव घेतली. न्यायालयाने याचिकाकर्त्याचा युक्तिवाद ऐकून १४ एप्रिल रोजी होणाऱ्या गोंदेगाव ग्रामपंचायत उपसरपंच निवडणुकीचे निकाल जाहीर न करण्याचा आदेश दिला आहे. याचिकाकर्त्यातर्फे ॲड. प्रितेश अतकर यांनी बाजू मांडली.