Akola News : यंदाच्या खरीप हंगामासाठी शेतकऱ्यांना १६ मेपासून कापूस बियाणे उपलब्ध करून दिले जात आहे. बोंडअळीचा प्रादुर्भाव रोखण्यासाठी कपाशीची पेरणी मात्र एक जूननंतरच करावी लागेल. या बाबत स्पष्ट सूचना काढण्यात आली आहे.

बोंडअळीच्या प्रादुर्भावामुळे गेल्या काही हंगामात कपाशीचे बियाणे एक जूननंतर शेतकऱ्यांना खरेदीसाठी उपलब्ध व्हायचे. यामुळे एकाच वेळी गर्दी व्हायची. काहीवेळा गैरसोयसुद्धा झाल्याच्या घटना समोर आल्या होत्या.

परिणामी कपाशीचे बियाणे जून आधी उपलब्ध व्हावे अशा स्वरूपाची मागणी शेतकरी, विक्रेत्यांकडूनही झाली. या वेळी धोरणात्मक निर्णय घेत कपाशीचे बियाणे शेतकऱ्यांसाठी १६ मे पासूनच बाजारात उपलब्ध राहणार आहे.

राज्यात सन २०१७ च्या खरीप हंगामात शेंदरी बोंड अळीने उच्छाद मांडला होता. मोठ्या प्रमाणात पिकाचे नुकसान होऊन उत्पादनही घटले होते. तेव्हापासून दरवर्षीच्या हंगामात या बोंडअळीला अटकाव घालण्यासाठी उपाययोजनांची अंमलबजावणी केल्या जात आहे.

सन २०१८ ते २०२३ दरम्यान केलेल्या उपाययोजनांमुळे शेंदरी बोंड अळीचा प्रादुर्भाव अत्यल्प प्रमाणात आढळून आला आहे. आगामी हंगामामध्ये या बोंडअळीचा प्रादुर्भाव होऊ नये यासाठी क्षेत्रिय पातळीवर आतापासूनच प्रतिबंधात्मक उपाययोजना राबविण्याचे सूचविण्यात आले आहे.

कापूस शास्त्रज्ञांच्या मतानुसार या बोंड अळीचा जीवनक्रम खंडित न झाल्याने प्रादुर्भाव वाढत असल्याचे दिसून येते. हंगामपूर्व कापूस लागवड झाल्यास शेंदरी बोंड अळीचा जीवनक्रमास पोषक वातावरण निर्माण होऊन प्रादुर्भाव वाढू शकतो. त्यामुळे हंगामपूर्व कपाशीची लागवड होणार नाही, यादृष्टीने काळजी घेणे आवश्यक असल्याचे म्हटले आहे.

काटेकोर नियोजन करुन अंमलबजावणी

शेतकऱ्यांना या हंगामासाठी लागवड करायचे असलेले कपाशीचे बियाणे १६ मे पासून उपलब्ध करुन दिले जाणार आहे. या बियाण्याची लावगड मात्र १ जूननंतरच होईल हे कटाक्षाने पालन केल्यास शेंदरी (गुलाबी) बोंड अळीचा प्रादुर्भाव प्रभावीपणे नियंत्रित करणे शक्य होईल.

यासाठी क्षेत्रीयस्तरावर जिल्हा अधीक्षक कृषी अधिकाऱ्यांनी काटेकोर नियोजन करुन अंमलबजावणी करावी, त्यावर विभागीय कृषी सहसंचालकांनी सनियंत्रण ठेवावे, असे निर्देश काढण्यात आले आहेत.