Jalgaon News : यंदा पाऊसमान कमी आहे. तसेच देशात कापूस लागवड मागील हंगामाच्या तुलनेत पाच टक्क्यांनी कमी झाली आहे. देशात यंदाच्या हंगामात कापसाचे उत्पादन ३२० ते ३२५ लाख गाठी (एक गाठ १७० किलो रुई) एवढे राहू शकते, असा अंदाज खानदेश जिनिंग-प्रेसिंग कारखानदार असोसिएशनच्या नॉर्थ गोवा येथे नुकत्याच झालेल्या दोनदिवसीय बैठकीत व्यक्त करण्यात आला.

‘असोसिएशन’चे अध्यक्ष प्रदीप जैन, उपाध्यक्ष अनिल सोमाणी, जीवन बयस, सचिव लक्ष्मण पाटील, अविनाश काबरा, विनय कोठारी, तसेच कापूस उद्योग जगतातून कॉटन असोसिएशन ऑफ इंडियाचे अध्यक्ष अतुल गणात्रा, महाराष्ट्र राज्य जिनिंग-प्रेसिंग असोसिएशनचे अध्यक्ष भूपेंद्रसिंह राजपाल, अरुण खेतान आदी उपस्थित होते. दोन दिवस या बैठकीत कापूस व्यापार व उत्पादन, पुढील अडचणी, गरजा यावर चर्चा झाली.

गणात्रा म्हणाले, ‘‘गेल्या हंगामात देशात ३१६ लाख गाठींची निर्मिती, तर १३ लाख गाठींची आयात झाली. फक्त १६ लाख गाठींची निर्यात झाली. देशात ३११ लाख गाठींचा वापर सरत्या हंगामात झाला आहे. यंदा कोरडवाहू कापसाची लागवड १५ ते २० दिवस उशिराने झाली. कारण जूनमध्ये पावसाचा खंड होता.

देशातील लागवड पाच टक्के कमी झाली आहे. जून व ऑगस्टमध्ये मिळून ४५ दिवस पावसाचा खंड होता. यामुळे मागील हंगामाच्या तुलनेत यंदा कापसाचे उत्पादन कमी येईल. देशात यंदा वस्त्रोद्योग १०० टक्के क्षमतेने कार्यरत राहिल्यास कापसाचा वापर वाढू शकतो.’’

‘व्यापारासाठी पुढील २० दिवस महत्त्वाचे’

‘‘जगात कापडाचा उपयोग कमी झाला आहे. पण अमेरिका व चीनमध्ये कापूस उत्पादनात घट येईल. अमेरिकेतील कापूस उत्पादनात ३५ लाख गाठींची घट येईल, असा अंदाज नुकताच आला आहे.

यातच पुढील २० दिवस कापूस व्यापारासंबंधी महत्त्वाचे असून, या कालावधीमधील घडामोडींवर बाजाराची चाल अवलंबून असेल,’’ असे कापूस व्यापाराचे जाणकार रमण भल्ला यांनी सांगितले.