Parbhani News : परभणी जिल्ह्यातील भारतीय कापूस महामंडळ (सीसीआय) खरेदी केंद्रावर दैनंदिन कापूस खरेदीत वाढ करावी अशी मागणी स्वाभिमानी शेतकरी संघटनेतर्फे सीसीआयच्या छत्रपती संभाजीनगर येथील उपविभागीय व्यवस्थापकांकडे केली आहे.

परभणी जिल्ह्यातील मानवत, सेलू, जिंतूर या ठिकाणी सीसीआयचे खरेदी केंद्र सुरू आहे. परभणी, गंगाखेड, पाथरी या तालुक्यांत कापूस पणन महासंघ खरेदी करीत होते.

परंतु या वर्षी त्यांच्याकडे कर्मचारी कमी असल्यामुळे त्यांची या तालुक्यात खरेदी बंद आहे. त्यामुळे मानवत, सेलू येथे जास्त कापसाची आवक वाढली आहे. त्यात आपल्या केंद्रामार्फत फक्त रोजचे कमीत कमी २०० ते ३०० क्विंटल कापूस खरेदी केला जातो.

शेतकऱ्यांची मोठ्या प्रमाणात आर्थिक लूट सुरू आहे. त्यातून शेतकऱ्यांचा उत्पादन खर्चसुद्धा भरून निघत नाही. मानवत, सेलू तालुक्यांतील खरेदी केंद्रावर खरेदी वाढवावी अशी मागणी स्वाभिमानी शेतकरी संघटनेचे जिल्हाध्यक्ष किशोर ढगे, रामप्रसाद गमे, मुंजाभाऊ लोडे, माणिक सूर्यवंशी, मयूर वाघमारे, नीलेश साबळे, दीपक गरुड, एकनाथ भालेराव यांनी निवेदनाद्वारे केली आहे.