Buldana News : तालुक्यात सातत्याने गेले तीन महिने पाऊस झाल्याचा सोयाबीन पाठोपाठ कापूस पिकाला मोठा फटका बसला. आता काही शेतांमध्ये कापूस वेचणी सुरू झाली असून अनेक बोंड काळवंडलेले असून कवडीचा कापूस अधिक प्रमाणात येत असल्याचे शेतकरी सांगत आहेत. नांदुरा तालुक्यात कापूस उत्पादकांचे सर्वाधिक प्रमाण आहे. कापसाचे या वर्षी १५ ते २० टक्के नुकसान आतापर्यंत झालेले असल्याचे स्पष्ट आहे.

यंदा सततच्या पावसामुळे कपाशीची बोंडे काळी पडून खराब झाली आहेत. त्यातील कवड्यासदृश कापूस काढण्यास अडचण येत आहे. विशेष म्हणजे यावर्षी मजुरीचा खर्च वाढल्याचा आधीच शेतकऱ्यांना फटका सहन करावा लागत आहे. नांदुरा तालुक्यात गणपती विसर्जनानंतर सतत पाऊस झाला. त्या पावसाने कापूस पिकाचे खूप नुकसान झाले.

झाडावर सुरुवातीला लागून असलेल्या कैऱ्या (बोंडे) काळ्या पडल्या. यातून जो कापूस निघतो आहे, तो कवडीचा कापूस आहे. अति पावसामुळे मक्याचे पीकही खराब झाल्याने शेतकरी हवालदिल झाला आहे. सतत पाऊस झाल्याने जमिनीत आर्द्रता निर्माण झाली. बोंडांना सूर्यप्रकाश न मिळाल्याने ते काळवंडले.

यातून जो कापस येत आहे, त्याला बाजारात दरही अत्यंत कमी मिळतो आहे. कापसाचे या वर्षी १५ ते २० टक्के नुकसान आतापर्यंत झालेले असल्याचे स्पष्ट आहे. कपाशी पिकाला एकरी ३० हजारांपर्यंत खर्च लागलेला आहे. त्यातच जर एकरी तीन ते चार क्विंटल कापूस आला तर उत्पादन खर्चही निघणे मुश्किल आहे.

असे आहे खरीप क्षेत्र

तालुक्यात सुमारे ४८ हजार ७९२ हेक्टर पेरणीलायक क्षेत्र आहे. २०२४-२५ च्या खरीप हंगामात तालुक्यात सर्वाधिक पेरा २० हजार ७१० हेक्टरवर सोयाबीन लागवड आहे. त्यापाठोपाठ कपाशीची १६ हजार ५५९ हेक्टरवर पेरणी झाली आहे. सोबतच तुरीचे ७ हजार २१८, मका २ हजार ५९६ हेक्टरवर पेरणी झालेली आहे.

सिंचनाची सुविधा असलेल्या कपाशी क्षेत्रात सुरुवातीला जी बोंडे लागली त्यापैकी बहुतांश काळवंडली आहेत. विशेष म्हणजे सुरुवातीला जी बोंडे लागलेली असतात त्यातील कापूस हा दर्जेदार व वजनदार असतो. याच कापसावर हंगामात किती उत्पादकता येईल याचा अंदाज बांधला जातो. यंदा १५ ते २० टक्के बोंडे अशी खराब झाली आहेत.