Kolhapur News : महात्मा फुले कृषी विद्यापीठ राहुरीअंतर्गत येथील अखिल भारतीय समन्वयित मका संशोधन केंद्राने मका पिकासाठी उत्तम वाणाची निर्मिती व मका उत्पादन तंत्रज्ञानाच्या अनेक शिफारशी देऊन मोलाचे योगदान दिल्याचे प्रतिपादन आंतरराष्ट्रीय मका व गहू संशोधन संस्थेचे प्रमुख शास्त्रज्ञ डॉ. पी. एच. झैदी यांनी केले.

तारदाळ (ता. हातकणंगले) येथे प्रक्षेत्र शिवार फेरी व शेतकरी मेळाव्यामध्ये डॉ. झैदी बोलत होते. ते म्हणाले, की आंतरराष्ट्रीय मका व गहू संशोधन संस्थेने महाराष्ट्रातील मका संशोधन केंद्राच्या माध्यमतून नवीन वाण निर्मितीसाठी शेतकऱ्यांच्या प्रक्षेत्रावर प्रयोग घेतले आहेत.

त्यामुळे निश्चितच नवीन मका वाणाची निर्मिती होऊन शेतकऱ्याचा सामाजिक व आर्थिक विकास होण्यास मदत होणार आहे. महाजन व मुजावर यांच्या शेतावर प्रक्षेत्र भेट झाली. अखिल भारतीय समन्वयित मका संशोधन केंद्राचे प्रमुख डॉ. सुनील कराड यांनी मक्याचे महत्त्व व उत्पादन तंत्रज्ञान या विषयी मार्गदर्शन केले.

डॉ. सुहास भिंगरदिवे यांनी सूत्रसंचालन केले. सुशांत महाडिक, आळते विस्तार गट प्रमुख बाबूराव आवळे, कृषी सहायक धनाजी शिरगावे, सागर शेळके यांनी परिश्रम घेतले. आळते गावचे पोलीस पाटील रियाज मुजावर, संदीप बनकर, तारदाळचे राजू बन्ने गुंडा विभुते आदी शेतकरी उपस्थित होते.