Jalgaon News : खानदेशात सततच्या पावसाने मृग बहरातील केळी लागवड रखडली आहे. पावसाने वाफसा नाहीसा झाला आहे. यामुळे लागवड करणे शक्य होत नसल्याचे शेतकऱ्यांचे म्हणणे आहे. पाऊस जोरदार नाही. पण रिपरीप, हलका पाऊस मागील पाच ते सहा दिवस काही भागात सुरू आहे.

जूनमध्ये अनेक भागात केळी लागवड झाली. जळगाव जिल्ह्यात रावेर, यावल, मुक्ताईनगर, चोपडा, पाचोरा-भडगाव, जामनेर, जळगाव, धुळ्यातील शिरपूर या भागात मृगबहर केळीची लागवड अधिक असते. रावेर, यावल भागांत अनेक शेतकरी लागवड करतात. या केळी लागवडीसाठी कमाल शेतकरी केळीचे कंद व काही शेतकरी उतिसंवर्धित रोपे उपयोगात आणतात.

दर्जेदार केळीचे वाण किंवा कंद लागवडीवर शेतकऱ्यांचा भर असतो. त्यासाठी आंबेमोहोर, श्रीमंती, महालक्ष्मी, सातमासी व ग्रॅण्ड नैन या वाणांच्या कंदांना शेतकरी पसंती देतात. केळी कंद औरंगाबादमधील कन्नड, सोयगाव, जळगावमधील जामनेर, रावेर, यावल, नंदुरबारमधील शहादा, तळोदा, अक्कलकुवा या भागात मुबलक प्रमाणात उपलब्ध आहेत. हलक्या, मध्यम जमिनीत काळ्या कसदार क्षेत्रातील कंद लागवडीला शेतकरी पसंती देतात.

तर काळ्या कसदार जमिनीत हलक्या, मध्यम जमिनीत कंद लागवडीला पसंती दिली जाते. परंतु गेले आठ ते १० दिवस खानदेशात सतत पाऊस सुरू आहे. वाफसा नाही. अनेक शेतकऱ्यांच्या केळी बागांमध्ये पाणी साचले. वाफसा नाहीसा झाला आहे.

यामुळे केळी बागांमधून कंद काढणे, त्यांची लागवड, वाहतूक यावर परिणाम झाला आहे. तसेच वाफसा नसल्याने लागवड करता येत नाही. सुमारे १० ते १५ हजार हेक्टवर नियोजीत केळी लागवडदेखील रखडली आहे. जळगाव जिल्ह्यात मृग बहरात केळीची एकूण सुमारे ५५ ते ६० हजार हेक्टरवर लागवड होईल, अशी अपेक्षा आहे. काही भागात पाणी कमी आहे. तर तापी, अनेरकाठी जलसाठे मुबलक आहेत. यामुळे केळी लागवड घटणार नाही, अशी स्थिती आहे.