New Delhi: भारत पाकिस्तानच्या संघर्षविरामासाठी मध्यस्थी केल्याच्या अमेरिकी अध्यक्ष डोनाल्ड ट्रम्प यांच्या दाव्यावरून पुन्हा एकदा काँग्रेस पक्षाने पंतप्रधान मोदींवर हल्ला केला आहे.

भारत आणि पाकिस्तानचा संघर्ष थांबविल्याचा दावा ट्रम्प यांनी ३४ दिवसांत १३ वेळा केला असताना पंतप्रधान मोदी यावर कधी बोलणार, असा सवाल काँग्रेसने केला. काँग्रेस सरचिटणीस जयराम रमेश यांनी सोशल मीडियावरील पोस्टद्वारे पंतप्रधान मोदींना लक्ष्य केले.

जयराम रमेश यांनी म्हटले, की ट्रम्प आज ७९ वर्षाचे झाले. १० मे ते १३ जून या कालावधीत ३४ दिवसांमध्ये त्यांनी तीन वेगवेगळ्या देशांमध्ये, १३ वेगवेगळ्यावेळी जाहीरपणे डांगोरा पिटला, की अमेरिकेशी होणाऱ्या व्यापाराच्या मुद्द्याचा वापर करून भारत आणि पाकिस्तानमध्ये संघर्षविराम घडवून आणला.

त्यांनी दोन्हीही देशांना एकसमानपद्धतीने लेखले. यानंतर आता पंतप्रधान मोदी, तुम्ही कधी बोलणार? पहलगाममध्ये २२ एप्रिलला झालेल्या हल्ल्यात २६ पर्यटकांचा बळी गेला.