Sindhudurg News : सिंधुदुर्ग जिल्ह्यातील पाच मंडलांतील शेतकऱ्यांच्या खात्यात अजूनही पीकविमा परतावा जमा न झाल्याने त्या शेतकऱ्यांमध्ये संभ्रमाचे वातावरण निर्माण झाले आहे. या संदर्भात कृषी विभागाने कृषी आयुक्त कार्यालयाशी पत्रव्यवहार सुरू केला आहे.

सिंधुदुर्गात एकूण ५७ मंडल असून या मंडलातील ४२ हजार १९० शेतकऱ्यांनी १९ हजार ९११ हेक्टर क्षेत्रावरील आंबा, काजू पीक क्षेत्र सरंक्षित केले होते. दरम्यान, स्वंयचलित हवामान केंद्रानुसार जिल्ह्यातील ५६ मंडले पीकविमा परताव्यास पात्र ठरली.

मालवण तालुक्यातील आंबेरी हे एकमेव केंद्र परताव्यास पात्र ठरलेले नाही. जिल्ह्यातील ५६ मंडलांतील शेतकऱ्यांना ६७ कोटी ९४ लाख सुरुवातीला परतावा मंजूर झाला. त्यानंतर त्यात सुधारणा होत आणखी काजू पिकासाठी वगळलेल्या मंडलांना पीकविमा परतावा देय असल्याचे स्पष्ट झाले. त्यामुळे त्यामध्ये सुमारे दोन कोटी रुपयांची रक्कम वाढली.

दरम्यान, जिल्ह्यातील ५६ पैकी ५१ मंडलातील आंबा, काजू बागायतदारांच्या खात्यात मागील दहा बारा दिवसांपासून पीकविमा परतावा जमा होण्यास सुरुवात होऊन तो बहुतांशी शेतकऱ्यांच्या खात्यात जमा झाला आहे.

परंतु जिल्ह्यातील सावंतवाडी तालुक्यातील सावंतवाडी, निरवडे, कुडाळ तालुक्यातील गोठोस, ओरोस बुद्रुक, दोडामार्ग तालुक्यातील तळकट अशा एकूण पाच मंडलातील शेतकऱ्यांना विमा परतावा आजमितीस मिळालेला नाही. त्यामुळे शेतकऱ्यांमध्ये संभ्रमाचे वातावरण निर्माण झाले आहे. या संदर्भात कृषी विभागाने कृषी आयुक्त कार्यालयाशी पत्रव्यवहार सुरू केला आहे.