Sindhudurg News : विविध हेतुने शासनाने शेतकऱ्यांना मोफत फार्मर आयडी देण्याचे जाहीर केले असले तरी विविध सामूहिक सुविधा केंद्र (सीएससी) केंद्रधारक शेतकऱ्यांकडून रक्कम उकळत आहेत. त्यामुळे शेतकऱ्यांमध्ये संभ्रमाचे वातावरण निर्माण झाले आहे.

शासनाने शेतकऱ्यांसाठी फार्मर आयडी बनविण्याची योजना आणली आहे. या योजनेचे विविध हेतू असून शेतकरी व त्यांच्या शेतजमिनीची ओळख पटविणे, पिकवीत असलेल्या पिकांची निश्चिती होणे.कर्जवितरणात सुलभता यावी, असे अनेक हेतू त्यामध्ये आहेत.

या शेतकरी आयडीमुळे पीएम किसान योजना, पीकविमा योजना, किसान क्रेडीट कार्ड यासह विविध फायदे शेतकऱ्यांना होणार असल्याचे शासनाकडून स्पष्ट करण्यात आले असून हे आयडी कार्ड सीएससी सेंटरवर मोफत काढून दिले जाणार आहे.

या सेंटरधारकांना शासनाकडून १५ रुपये दिले जाणार आहेत. मात्र सिंधुदुर्गात काही सेंटरवर शेतकऱ्यांनाकडून रक्कम घेतली जात आहे. त्यामुळे हे फार्मर आयडी नक्की शासन मोफत देतेय का? असा प्रश्न शेतकऱ्यांकडून विचारला जात आहे.