Nagar News : अकोले तालुक्यातील कोंभाळणे येथील बीजमाता राहीबाई सोमा पोपेरे (Rahibai Soma Popere) यांच्या मार्गदर्शनाने उभ्या राहिलेल्या देशातील पहिल्या देशी बियाणे बँकेला जिल्हाधिकारी सिद्धराम सालीमठ यांनी नुकतीच भेट दिली. या वेळी त्यांनी राहीबाई जिल्ह्याला लाभलेले वरदान आहे, असे गौरवोद्‌गार काढले.

जिल्हाधिकारी सालीमठ यांनी पदभार स्वीकारल्यानंतर प्रथमच आदिवासी भागाचा दौरा केला. त्यांच्या समवेत प्रांताधिकारी डॉ. शशिकांत मंगरुळे, बायफचे विभागीय अधिकारी जितीन साठे उपस्थित होते.

देशी बियांच्या संवर्धनासाठी देश आणि विदेशात प्रसिद्ध असलेल्या बीजमाता राहीबाई पोपेरे यांची भेट घेऊन या विषयाची सविस्तर माहिती यावेळी जिल्हाधिकाऱ्यांनी घेतली. राहीबाई यांचे पारंपरिक बियाणेसंवर्धनातील ज्ञान व अभ्यास पाहून त्यांनी आश्‍चर्य व्यक्त केले.

अहमदनगर जिल्ह्यातील आदिवासी अतिदुर्गम भागात अशा पद्धतीचे काम उभे राहिल्याचे समाधान सालीमठ यांनी व्यक्त केले. जास्तीत जास्त शेतकऱ्यांपर्यंत या विषयाचे ज्ञान पोहोचावे, यासाठी कृषी विभागाने पुढाकार घेण्याचे आवाहन त्यांनी केले.

राहीबाई यांनी जतन केलेल्या विविध गावरान वाणांची तंत्रशुद्ध माहिती आपणास प्रेरणा देऊन गेली. जिल्ह्यात काम करताना या ज्ञानाचा उपयोग होणार असल्याचे त्यांनी नमूद केले.

राहीबाईंनी कळसूबाई बियाणेसंवर्धन सामाजिक संस्थेच्या वतीने जिल्हाधिकारी व प्रांताधिकाऱ्यांचा सत्कार केला. जास्तीत जास्त शेतकऱ्यांपर्यंत देशी वाण पोहोचविण्याचा मानस राहीबाई यांनी या वेळी व्यक्त केला.

जिल्हाधिकाऱ्यांना बियाणे संच भेट

राहीबाईंनी जतन केलेल्या विविध वाणांची माहिती जिल्हाधिकाऱ्यांना दिली. त्यांच्या संग्रही असलेले भाजीपाला बियांचे संच या वेळी त्यांनी त्यांना भेट दिले.