Pune News : विधानसभा निवडणुकीत महायुतीला निर्विवाद यश मिळाले असून मुख्यमंत्रीपदावरून महायुतीत पेच निर्माण झाला होता. तर काळजीवाहू मुख्यमंत्री एकनाश शिंदे नाराज असल्याच्या बातम्या येत होत्या. दरम्यान शिंदे यांनी मुख्यमंत्रीपदावरून पहिल्यांदाच पत्रकार परिषद घेऊन आपली भूमीका स्पष्ट केली. यावेळी शिंदे यांनी, पंतप्रधान नरेंद्र मोदी, अमित शाह मुख्यमंत्रीपदाबाबत जो निर्णय घेतील, तो आपल्यासह शिवसेनेला मान्य असेल, असे स्पष्ट करत मुख्यमंत्रीपदावरचा दावा सोडला आहे. यामुळे आता देवेंद्र फडणवीस राज्याचे मुख्यमंत्री होतील अशी चर्चा सुरू झाल्या आहेत.

विधानसभा निवडणुकीत महायुतीला एकतर्फी यश मिळाले असून २३० आमदार महायुतीचे निवडणूक आले आहेत. आता सत्ता स्थापनेच्या घडामोडींना वेग आला असून नव्या सरकारच्या नेतृत्त्वावरून महायुतीत पेच निर्माण झाला आहे. एकनाथ शिंदे यांच्याकडे मुख्यमंत्रीपद असावे, या मागणीसाठी शिवसेनेचे खासदार दिल्लीत केंद्रीय गृहमंत्री अमित शाह यांची भेट घेणार आहेत.

दरम्यान एकनाथ शिंदे यांनी, ताणलेल्या मुख्यमंत्रीपदावर मौन सोडले. यावेळी त्यांनी, आपल्याला मोदी, अमित शाह यांचा फोन आला होता. त्यांना आपण, सरकार स्थापनेत माझ्यामुळे कोणतीच अडचण होणार नाही, अशी हमी दिली आहे. तर जो निर्णय घ्यायचा असेल तो घ्या, तो आपल्यासह शिवसेनाला मान्य आहे, असे म्हटले आहे.

महायुती मजबूत असून जनतेसाठी काम करायचे आहे. जनतेने आपल्याला संधी दिली असून जनतेसाठी काम करायचे आहे. राज्याला विकासाकडे न्यायचे आहे. कुठेही आमचे घोडे अडलेले नसून मी मोकळ्या मनाचा माणूस आहे. यामुळे आपण मोदींना सगळ्या पदांपेक्षाही लाडका भाऊ ही ओळख मोठी असल्याचेही शिंदे यांनी सांगितले आहे.

अडिच वर्षात महायुतीने केलेले काम आणि कल्याण कारी योजनांची सांगड घेतली. यामुळे आज अनेक प्रकल्प आपल्या समोर आहेत. आपण सर्वसामान्य शेतकरी कुटुंबातून आल्याने त्यांच्या वेदना व्यथा माहित आहेत. यामुळेच अधिकार आल्यावर सर्वसामान्य जनतेसह लाडक्या बहिणी, भाऊ शेतकरी, ज्येष्ठ आणि रुग्णांसाठी काम करण्याचे ठरवले होते. त्या भावनेप्रमाणे काम केल्याचे शिंदे यांनी म्हटले आहे.

तर महायुतीचे सरकार येण्याची कोणतीच अडचण नसून उद्या अमित शाह यांच्याशी दिल्लीत बैठक होणार आहे. त्या बैठकीत मुख्यमंत्रीपदाबाबत निर्णय होईल. दिल्लीत जावून आल्यावर राज्यात सत्ता स्थापन होईल, असेही शिंदे यांनी स्पष्ट केले आहे.

महायुतीला मिळालेल्या निर्विवाद यशात एकट्या भाजपकडे १३२ आमदार आहेत. पण सत्ता स्थापनेत मुख्यमंत्रीपदावरून एकनाथ शिंदे नाराज असल्याचे चर्चा होत्या. मात्र आता मुख्यमंत्रीपद मिळणार नाही हे चित्र भाजपकडून स्पष्ट झाल्यानंतर आता शिंदे यांनी मुख्यमंत्रीपदाच्या रेसमधून काढता पाय घेतला आहे. तर आपण या रेसमधून बाहेर पडत असून भाजप जो निर्णय घेईल तो मान्य असेल असे स्पष्ट केले आहे. यामुळे आता देवेंद्र फडणवीस यांच्या मुख्यमंत्रीपदी नियुक्तीचा मार्ग मोकळा झाला आहे.