Akola Chicken Festival News : दैनंदिन आहारात पोषण (Daily Diet) मूल्य घटकांचा समावेश असणे आवश्यक आहे. त्यातूनच शरीराला आवश्यक ऊर्जा, पोषण (Nutrition) मिळते. शिवाय रोगप्रतिकारक शक्ती निर्माण होऊन शरीराला योग्य फायदा होतो, असे मत येथील स्नातकोत्तर पशुवैद्यक व पशुविज्ञान संस्थेचे सहयोगी अधिष्ठाता डॉ. धनंजय दिघे यांनी केले.

कुक्कुटपालन शास्त्र विभागाच्या वतीने आयोजित चिकन महोत्सवात ते बोलत होते. कुक्कुटपालन प्रक्षेत्रावर आयोजित या महोत्सवाचे उद्दिष्ट योग्य वाढ झालेल्या चिकनचा आहारात वापर करण्याबाबत जनजागृती करणे हा होता.

या वेळी जिल्हा परिषदेचे अतिरिक्त मुख्य कार्यकारी अधिकारी डॉ. सुभाष पवार, जिल्हा माहिती अधिकारी डॉ. मिलिंद दुसाने, कुक्कुटपालन शास्त्र विभागप्रमुख डॉ. सतीश मनवर, डॉ. सुनील वाघमारे, डॉ. प्रशांत कपले, डॉ. मंगेश वाडे, डॉ. सुनील हजारे, डॉ. डी. एम. बदुकले, डॉ. मंगेश इंगवले, डॉ. रणजित इंगोले आदी उपस्थित होते.

डॉ. दिघे म्हणाले, ‘‘पक्षाच्या मांसातून मिळणारे पोषणमूल्य, सूक्ष्मद्रव्ये, प्रथिने, अमिनो आम्ले, चव इत्यादी घटकांबाबत विचार करून त्यानुसार योग्य कालावधीत ते आहारात समाविष्ट केले पाहिजेत. त्यासाठी चिकनचे मांस हे तीस दिवसांपर्यंतच्या कालावधीत आहारात समाविष्ट झाले पाहिजे.’’

डॉ. पवार यांनी आहार जनजागृतीवर भर द्यावा असे आवाहन केले. डॉ. मनवर यांनी चिकन महोत्सवाची भूमिका स्पष्ट केली. सूत्रसंचालन डॉ. मंगेश वड्डे यांनी केले. डॉ. प्रशांत कपले यांनी आभार मानले.