Parbhani News : जागतिक तापमान वाढमुळे (ग्लोबल वॉर्मिंग) कीड, रोगाच्या प्रादुर्भावात बदल होणार आहेत. कृषी विद्यापीठांमध्ये त्यावर संशोधन सुरू आहे. यासंशोधनाचे निष्कर्ष शेतकऱ्यांपर्यंत पोहोचविण्याची जबाबदारी कृषी विभागाची आहे.

शेतकऱ्यांच्या गरजा व समस्यांची माहिती कृषीच्या क्षेत्रीय कर्मचाऱ्यामार्फत मिळायला हवी. त्यादृष्टीने कृषी विभागाची प्रशिक्षण व भेट योजना परत सुरू करण्याची गरज आहे, असे प्रतिपादन ज्येष्ठ कृषी कीटकशास्त्रज्ञ तथा इंफाळ येथील केंद्रीय कृषी विद्यापीठाचे माजी कुलगुरू डॉ. सुभाष पुरी यांनी केले.

वसंतराव नाईक मराठवाडा कृषी विद्यापीठातील कृषी कीटकशास्त्र विभाग आणि कृषी विभाग यांच्या तर्फे पिकांवरील कीड, रोग सर्वेक्षण व सल्ला प्रकल्प (क्रॉपसॅप) व फळ पिकांवरील कीड, रोग सर्वेक्षण व सल्ला प्रकल्प (हॉर्टसॅप) अंतर्गत कृषीच्या लातूर व छत्रपती संभाजीनगर विभागातील जिल्हा अधीक्षक कृषी अधिकारी, उपविभागीय कृषी अधिकारी, तालुका कृषी अधिकारी, जिल्हा समन्वयक शास्त्रज्ञ, कृषी विज्ञान केंद्रातील पीक संरक्षण विशेषज्ञ यांची कार्यशाळा शुक्रवारी (ता. २६) कृषी महाविद्यालयाच्या सभागृहामध्ये आयोजित करण्यात आली होती.

या वेळी डॉ. पुरी बोलत होते. कुलगुरू डॉ. इंद्र मणी मिश्रा अध्यक्षस्थानी होते. शिक्षण संचालक डॉ. उदय खोडके, संशोधन संचालक डॉ. खिजर बेग, विस्तार शिक्षण संचालक डॉ. भगवान आसेवार, विभागीय कृषी सहसंचालक साहेबराव दिवेकर (लातूर), डॉ. तुकाराम मोटे (छत्रपती संभाजीनगर), जिल्हा अधीक्षक कृषी अधिकारी अनिल गवळी, प्राचार्य डॉ. सय्यद इस्माईल, डॉ. संजीव बंटेवाड, कृषी कीटकशास्त्र विभाग प्रमुख डॉ. पुरुषोत्तम नेहरकर, वनस्पती रोगशास्त्र विभाग प्रमुख डॉ. संदीप बडगुजर, क्रॉपसॅपचे समन्वय अधिकारी अनंत लाड, उपविभागीय कृषी अधिकारी रवी हरणे आदी उपस्थित होते.

डॉ. पुरी म्हणाले, की शेतकरी आत्महत्या आणि पीक संरक्षण याचा सहसंबध आहे. कर्जबाजारी होऊन शेतकरी आत्महत्या करत आहेत. कर्जबाजारी शेतकऱ्यांचे मानसिक समुपदेशन कृषी सहायकामार्फत करता येईल. डॉ. इंद्र मणी म्हणाले, की कृषी विद्यापीठ व कृषी विभाग हे अनेक बाबतीत परस्परावलंबी आहेत.

कृषी विद्यापीठात निर्मित ज्ञान व तंत्रज्ञान कृषी विभाग तसेच कृषी विज्ञान केंद्र करत आहेत. दर सहा महिन्यांनी कृषी विद्यापीठ व कृषी विभागाची बैठक व्हावी. त्यातून संशोधनाची दिशा निश्‍चित करता येईल. दिवेकर म्हणाले, की क्रॉपसॅप प्रकल्प सुरू झाल्यापासून शेतकऱ्यांना कीड, रोगाचा प्रादुर्भावाचे वेळीच नियंत्रण करणे शक्य होत आहे. कृषी विद्यापीठ व कृषी विभागाच्या एकत्रित कामांचे हे यश आहे. प्रास्ताविक डॉ. नेहरकर यांनी केले. सूत्रसंचालन डॉ. लाड यांनी केले तर डॉ. बंटेवाड यांनी आभार मानले.