ॲग्रोवन वृत्तसेवा
Winter Session : नागपूर : चंद्रपूर जिल्हा मध्यवर्ती सहकारी बँकेतील व्यवहाराची चौकशी गतीने पूर्ण केली जाईल, असे सहकारमंत्री दिलीप वळसे पाटील यांनी विधानसभेत सांगितले.

काँग्रेसच्या आमदार प्रतिभा धानोरकर यांनी यासंदर्भात लक्षवेधी सूचना मांडली होती. त्याला उत्तर देताना ते बोलत होते.

संचालक मंडळाने पैशाचा अपव्यय केला असून मुदत संपूनही त्याची निवडणूक लागलेली नाही. बँकेच्या सीईओंवर गंभीर गुन्हे दाखल केले आहेत. तसेच शेतकरी सन्मान निधीचा वापर खासगी संस्थेच्या कामासाठी केला आहे.

बँकेत अनियमितता असूनही चौकशी केली जात नाही, या बँकेवर तत्काळ प्रशासक नेमावा, अशी मागणी केली. यावर वळसे पाटील म्हणाले, की चंद्रपूर जिल्हा मध्यवर्ती बँकेची मुदत २०१७ मध्ये संपली आहे.

दरम्यानच्या काळात उच्च न्यायालयात याचिका दाखल करण्यात आल्याने या प्रकरणी उच्च न्यायालयाने स्थगिती दिली.

ही स्थगिती जोपर्यंत उठत नाही तोपर्यंत सहकार कायद्यानुसार बँकेच्या संचालक मंडळाची निवडणूक घेता येणार नाही आणि त्या बँकेवर प्रशासकसुद्धा नेमता येणार नाही. उच्च न्यायालयाच्या निर्णयामुळे संचालक मंडळ कायम राहील.