Latur News : कृषी विभागाच्या लातूर विभागातील लातूर, धाराशिव, परभणी, हिंगोली व नांदेड या पाच जिल्ह्यांतील रब्बीच्या पेरण्यांनी आता चांगलाच वेग घेतला आहे. आतापर्यंत ५३ टक्के पेरण्या झाल्या आहेत. परभणी, हिंगोली व धाराशिव जिल्हे पेरणीत आघाडीवर असून, नांदेड व लातूर जिल्हे मागे आहेत.

येत्या आठवड्यात आणखी पेरण्यांना वेग येणार असून, आतापर्यंत पाच जिल्ह्यांत १३ लाख ६३ हजार ९६० पैकी सात लाख २० हजार ९६० हेक्टरवर (५२.८६ टक्के) रब्बीच्या पेरण्या पूर्ण झाल्या आहेत. यात हरभराच हुकमी पीक असून, विभागात चार लाख ८७ हजार ४५९ हेक्टरवर हरभऱ्याची पेरणी शेतकऱ्यांनी केली आहे.

मागील आठवड्यात पाचही जिल्ह्यांत हवामान थंड व कोरडे असल्याने पेरण्यांना चांगलाच वेग आला. खरिपातील तुरीचे पीक सध्या फुलोऱ्यात असून, कापसाच्या काही भागात दुसऱ्या, तर काही भागात तिसऱ्या वेचण्या सुरू आहेत. खरीप ज्वारी व बाजरी दाणे पक्वतेच्या अवस्थेत असून, काही भागात काढणी सुरू झाली आहे.

सलग दुसऱ्या आठवड्यात रब्बीच्या पेरणीत परभणी जिल्हा आघाडीवर असून, या जिल्ह्यात ६२ टक्क्यांच्या पुढे पेरण्या झाल्या आहेत. हिंगोली जिल्ह्याचा दुसरा क्रमांक असून, जिल्ह्यात ६१ टक्क्यांच्या पुढे पेरण्या उरकल्या आहेत. नांदेड, धाराशिव व लातूर जिल्ह्यांत अजून ५० टक्क्यांच्या आतच पेरण्या असून, येत्या आठवड्यात हा टक्का वाढण्याची आशा आहे.

आतापर्यंत रब्बी ज्वारीची सर्वसाधारण तीन लाख ७१ हजार ८५७ पैकी एक लाख ७९ हजार ६७९ हेक्टरवर (४८.३२ टक्के) पेरणी झालेली आहे. ज्वारी सध्या वाढीच्या अवस्थेत असून, धाराशिव जिल्ह्यात काही भागांत ज्वारीवर लष्करी अळीचा प्रादुर्भाव दिसून आला आहे.

गव्हाची एक लाख ६५ हजार १९ पैकी ३१ हजार ८०६ (२०.३२ टक्के) हेक्टरवर पेरणी झाली असून, हे पीक सध्या उगवणीच्या अवस्थेत आहे. हरभराची सात लाख ८६ हजार १२४ पैकी चार लाख ८७ हजार ४५९ (६२.०१ टक्के) हेक्टरवर पेरणी झाली असून, हरभरा उगवणीच्या स्थितीत आहेत. तेलबियामध्ये सर्वाधिक करडईची १९ हजार ५३१ पैकी ११ हजार ६०३ (५९.४१ टक्के) हेक्टरवर पेरणी झाली आहे. त्यानंतर जवळ, तीळ व सूर्यफुलाचीही पेरणी कमीअधिक प्रमाणात झाली आहे.