Solapur News : जलजीवन मिशनमधून माळशिरस तालुक्यातील पठाणवस्ती, भांब, येळीव व पुरंदावडे गावांसाठी योजना पाणी योजना मंजूर होती. परंतु काम सुरू होत नव्हते. त्याशिवाय फडतरी, सदाशिवनगर, मारकडवाडी (ता. माळशिरस) या गावात काम सुरू होते,

परंतु कामाला गती नव्हती. मुख्य कार्यकारी अधिकारी मनीषा आव्हाळे यांनी या सात गावांतील सरपंच, ग्रामसेवक, ठेकेदार यांची माळशिरस पंचायत समितीत बैठक घेऊन या सातही गावच्या पाण्याचा प्रश्न सोडवला.

मुख्य कार्यकारी अधिकारी आव्हाळे यांनी नुकताच माळशिरस तालुक्याचा दौरा केला. या दौऱ्यात त्यांनी जलजीवन मिशनसह माळशिरस तालुक्यात सुरू असलेल्या विकास कामांची पाहणी केली. माळशिरस तालुक्यातील बोंडले, वेळापूर, पानीव, झंजेवाडी, मोटेवाडी या गावांमधील जलजीवन मिशनच्या कामांना त्यांनी भेट देऊन पाहणी केली.

त्यानंतर माळशिरस पंचायत समितीमध्ये पाहणी केली. पानीव प्राथमिक आरोग्य केंद्राच्या इमारतीला भेट देऊन इमारतीच्या कामाची गुणवत्ता पूर्ण होत असल्याची खात्री केली. इमारतीचे काम गुणवत्तेचे करा, फेब्रुवारीअखेर पर्यंत हे काम पूर्ण करण्याची सूचना त्यांनी दिली.

तसेच या सातही गावांतील जलजीवनच्या कामातील अडचणी, त्यावरील उपायांवर सरपंच, ग्रामसेवकांशी चर्चा केली आणि त्यातल्या अडचणी दूर करत तातडीने ही कामे सुरू करण्याचे आदेश दिले.

आरोग्य केंद्रांची केली पाहणी

माळशिरस दौऱ्यात वेळापूर, पानीवसह प्राथमिक आरोग्य केंद्र व उपकेंद्रांची पाहणी केली. औषध भांडार, ऑनलाइन औषध प्रणाली व सर्व रजिस्टरची स्वतः खातर जमा करून औषधसाठा तपासला. बाह्यरुग्ण तपासणी विभाग, प्रसूतिगृह, ऑपरेशन थिएटर व शौचालये, परिसर, निवासस्थाने यांना भेट देऊन पाहणी केली.