Pune News : वेस्टर्न डिस्टर्बन्समुळे देशात उत्तरेकडील राज्यांमध्ये तापमानात मोठ्या प्रमाणात घट होत आहे. तर काश्मीर खोऱ्यात बर्फवृष्टी सुरू आहे. त्यामुळे उत्तरेकडील राज्यांमध्ये थंडी कायम राहणार असल्याचा इशारा हवामान विभागाने दिला आहे. तर उत्तरेकडे होणाऱ्या या बदलांमुळे महाराष्ट्रातील मध्य आणि उत्तरेकडील भाग, कोकण, विदर्भ आणि मराठवाड्यातील जिल्ह्यात थंडी वाढलेली आहे. येथे सरासरी तापमान हे तीन अंश सेल्सिअसपर्यंत कमी झाला असून येथेही पुढील दोन दिवस थंडीचा कडाका कायम राहील असा अंदाज हवामान विभागाने वर्तविला आहे. हा अंदाज हवामान विभागाने मंगळवारी वर्तविला आहे.

देशात उत्तरेकडील राज्यांमध्ये वेस्टर्न डिस्टर्बन्समुळे हवामानात झपाट्याने बदल होत असून काश्मीर खोऱ्यात बर्फवृष्टी होत आहे. दरम्यान हवामान विभागाकडून थंडी आणि धुक्याचा रेड आणि ऑरेंज अलर्ट काही राज्यांना दिला आहे. तसेच पुढील पाच दिवस उत्तर भारतात दाट धुक्याची शक्यतेचा अंदाज विभागाकडून वर्तविण्यात आला आहे.

दरम्यान काश्मीर खोऱ्यात होणाऱ्या बर्फवृष्टीमुळे दिल्लीत थंडीची लाट कायम असून येथे थंडीसह दाट धुक्याची चादर पाहायला मिळत आहे. ज्यामुळे विमान सेवा आणि रेल्वे वाहतूक विस्कळीत झाली आहे. दाट धुक्यामुळे अनेक रेल्वे गाड्या उशिरा धावत आहेत. यामुळे प्रवाशांना प्रचंड अडचणींचा सामना करावा लागत आहे.

दरम्यान उत्तर भारतात सुरू असणाऱ्या या थंडीच्या लाटेचा परिणाम दिसून येत आहे. महाराष्ट्रातील मध्य आणि उत्तरेकडील भाग, कोकण, विदर्भ आणि मराठवाड्यातील जिल्ह्यात थंडी वाढलेली आहे. तर नाशिक जिल्ह्यातील निफाड येथे नीचांकी तापमानाची नोंद झाली आहे. येथे ७.४ अंश सेल्सिअस तापमानाची नोंद झाली आहे. तसेच जळगावात बुधवारी ९.३ अंश सेल्सिअस तापमानाची नोंद झाली आहे. नीचांकी तापमानाची दुसरी नोंद आहे.