Dharashiv News : काही वर्षापासून रखडलेल्या निम्न तेरणा उपसा सिंचन प्रकल्पाच्या ११३ कोटींच्या दुरुस्ती प्रस्तावाला गुरुवारी (ता. १०) राज्य मंत्रिमंडळाने मान्यता दिली आहे.

या कामामुळे धाराशिव, तुळजापूर, लोहारा आणि औसा तालुक्यातील शेतकऱ्यांसह धाराशिव शहरालाही याचा लाभ होणार आहे, अशी माहिती आमदार राणाजगजितसिंह पाटील यांनी दिली.

आमदार पाटील म्हणाले, की जलसंपदा विभागाकडे कोणत्याही प्रकल्पाच्या दुरुस्तीसाठी एकूण बजेटच्या केवळ १० टक्के एवढीच तरतूद असते. निम्न तेरणा उपसा सिंचन प्रकल्पाच्या दुरुस्तीसाठी ११३ कोटी रुपयांची आवश्यकता होती.

त्यामुळे तांत्रिकदृष्ट्या किचकट प्रश्न तयार झाला होता. स्थापत्य, विद्युत आणि यांत्रिकी विभागात समन्वय घडवून प्रकल्पाच्या दुरुस्तीसाठी त्यांची तांत्रिक मान्यता घेतली. अखेर दुरुस्ती प्रस्तावाला गुरुवारी मंत्रिमंडळाची मंजुरी मिळाली.

त्रुटींची पूर्तता करून अंतिम मान्यतेसाठी दुरुस्ती प्रस्ताव राज्य सरकारकडे सादर करण्यात आला होता. त्यावर मंत्रिमंडळाने शिक्कामोर्तब केले. हक्काचे ४२ दलघमी पाणी अगोदरच आरक्षित करून ठेवलेले आहे. त्यामुळे धाराशिव, तुळजापूर आणि लोहारा तालुक्यातील शेतकऱ्यांना त्याचा मोठा लाभ होईल, अशी आशा आमदार पाटील यांनी व्यक्त केली.