Sangli News : ‘‘कृषी विज्ञान केंद्र बारामती गेल्या तीन वर्षांपासून कृत्रिम बुद्धिमता तंत्रज्ञावर अभ्यासपूर्ण प्रात्यक्षिके घेत आहे. ऊस शेतीमध्ये अचूक व्यवस्थापन होणेसाठी कृत्रिम बुद्धिमता तंत्रज्ञाचा वापर करणे फायदेशीर आहे,’’ असे मत कृषी विज्ञान केंद्राचे डॉ. तुषार जाधव यांनी व्यक्त केले.

कुंडल येथील क्रांतिअग्रणी डॉ. जी. डी. बापू लाड सहकारी साखर कारखाना व अॅग्रीकल्चर डेव्हलपमेंट ट्रस्ट बारामतीचे कृषी विज्ञान केंद्र यांच्या संयुक्त विद्यमाने ‘ऊस शेतीत कृत्रिम बुद्धिमत्तेचा वापर’ या विषयावरील शेतकरी चर्चा सत्रात ते बोलत होते. सदर कार्यक्रमप्रसंगी कारखान्याचे मार्गदर्शक संचालक आ. अरुण लाड व बारामती केव्हीकेचे डॉ. तुषार जाधव यांची प्रमुख उपस्थित होती.

डॉ. तुषार जाधव म्हणाले, की या तंत्रज्ञानामुळे पाणी व्यवस्थापनासाठी आयओटी मॉइश्चर सेन्सर, स्वयंचलित हवामान केंद्र, उपग्रह प्रणाली आणि ड्रोन इमेजनरी तंत्रज्ञान घटकांचा वापर होणार आहे. तसेच पिकाला पाण्याची गरज, रोग- किडीची ओळख व पूर्वसूचना, पिकाच्या वाढीचा निर्देशांक यांची बिनचूक माहिती मिळणार आहे.

आमदार अरुण लाड म्हणाले, की आपल्या कारखान्याच्या माध्यमातून शेतकऱ्यांना त्यांच्या शेतीत आधुनिक तंत्रज्ञानाचा वापर करण्यासाठी प्रोत्साहन देण्यात येते. ऊस विकास विभागाच्या माध्यमातून शेतकऱ्यांना मुख्य मशागत वगळता ऊस लावणीपासून ते तोडणीपर्यंत संपूर्ण निविष्ठा व आर्थिक साहाय्य केले जाते. आता ‘कृत्रिम बुद्धिमता’ याही तंत्रज्ञानाचा वापर ऊस शेतीत शेतकऱ्यांनी करून एकरी उत्पादन वाढवावे.

कारखान्याचे अध्यक्ष शरद लाड म्हणाले, की कृत्रिम बुद्धिमत्तेचा वापर ऊसशेती क्षेत्रात सुरू झाला आहे. अधिक उत्पन्न मिळवण्यासाठी शेतकऱ्यांनीही बदलण्याची गरज आहे. या तंत्रज्ञानाच्या वापराने ऊस शेतीत क्रांती घडेल.

अरुण पडूळ यांनी उपग्रह प्रणालीच्या ऊस शेतीमधील वापराची चित्ररूप माहिती दिली. तसेच फायलो स्मार्ट इरिगेशनचे प्रमोद चौंडीकर यांनी आयओटी संवेदकाबद्दल सविस्तर माहिती सांगितली. या चर्चासत्रास कार्यकारी संचालक अप्पासाहेब कोरे, संचालक, सभासद, ऊसउत्पादक शेतकरी, अधिकारी उपस्थित होते.