Solapur News : गोशाळांमध्ये ठेवण्यात येणाऱ्या देशी गायींच्या पालन पोषणासाठी प्रति दिन, प्रति गाय पन्नास रुपये अनुदान देण्यात येणार आहे. योजनेसाठी महाराष्ट्र गोसेवा आयोगाकडे नोंदणीकृत व सदर शासन निर्णयामधील नमूद निकषानुसार पात्र गोशाळा, गोसदन पांजरापोळ व गोरक्षण संस्थांनी ५ जानेवारी २०२५ रोजीपर्यंत ऑनलाइन अर्ज करावा, असे आवाहन जिल्हा पशुसंवर्धन उपआयुक्त, डॉ. विशाल येवले यांनी केले आहे.

या योजनेचा उद्देश व स्वरूप, अनुदान पात्रतेच्या अटी व शर्ती, योजनेची अंमलबजावणी, तसेच योजनेचा ऑनलाइन अर्ज व त्यासोबत जोडावयाची आनुषंगिक कागदपत्रे इत्यादी बाबतची सविस्तर माहिती www.mahagosevaayog.org व https//schemes.mahagosevaayog.org या संकेतस्थळावर उपलब्ध करुन देण्यात आलेली आहे.

पशुसंवर्धन विभागाच्या ८ ऑक्टोबर २०२४ च्या शासन निर्णयातील नमूद पात्रतेच्या अटीनुसार इच्छुक पात्र संस्थांनी ऑनलाइन पद्धतीने विहित नमुन्यातील अर्ज उपरोक्त संकेतस्थळावर ५ जानेवारीपर्यंत ऑनलाइन सादर करावेत.

महाराष्ट्र गोसेवा आयोग कार्यालयाकडे थेट प्रस्ताव सादर केलेला तसेच ई-मेल किंवा तत्समद्वारे सादर केलेले अर्ज ग्राह्य धरले जाणार नाहीत, असे आवाहनही जिल्हा पशुसंवर्धन उपआयुक्त डॉ. येवले यांनी केले आहे.