महायुती विरुद्ध महाविकास आघाडीत सुरुवातीच्या कलानुसार चुरशीची लढत रंगलेली आहे. एकूण २८८ पैकी २७२ मतदारसंघाचे कल समोर आले आहेत. महायुतीने १४५ जागांवर आघाडी घेतली आहे. तर १३१ जागांवर महाविकास आघाडीने आघाडी घेतली आहे. अर्थात हे सुरुवातीचे कल आहेत. दुपारपर्यंत निकालाचं चित्र स्पष्ट होईल. परंतु ९ वाजून २१ मिनिटाच्या कलानुसार महायुती आणि आघाडीत रस्सीखेच सुरू आहे.

पहिल्या फेरीतील आघाडीत पक्षनिहाय आकडेवारीत भाजपनं आघाडी घेतली आहे. भाजपने ९३ जागांवर पहिल्या कलात आघाडी घेतली आहे. तर एकनाथ शिंदे यांच्या शिवसेनेनं २७ आणि अजित पवारांच्या राष्ट्रवादी कॉँग्रेसने २८ जागांवर आघाडी घेतली आहे. तर महाविकास आघाडीतील कॉँग्रेसने ४९, शिवसेना उद्धव बाळासाहेब ठाकरे शिवसेनाने ३७ आणि शरद पवार राष्ट्रवादी कॉँग्रेसने ४५ जागांवर आघाडी घेतली आहे. तर मनसे २ तसेच इतरने ८ जागांवर आघाडी घेतली आहे.

राज्यात २८८ जागांसाठी २० नोव्हेंबर रोजी मतदान झाले. आज विधानसभा निवडणुकीचे निकाल समोर येणार आहे. महायुती आणि महाविकास आघाडीने या निवडणुकीत जोरदार प्रचार केला होता. लाडक्या योजनांसोबत धार्मिक ध्रुवीकरणावरून प्रचारसभांमध्ये जोरदार आरोप प्रत्यारोप झाले होते. दरम्यान राज्यात एकूण ४ हजार १३६ उमेदवारांनी निवडणुक लढवली आहे.

सोयाबीनचा मुद्दा

प्रचाराच्या शेवटच्या टप्प्यात सोयाबीनच्या दरावरून राजकीय वातावरण तापले होते. महायुती आणि महाविकास आघाडीच्या मोठ्या नेत्यांनी सोयाबीन दरावरून आश्वासनाची उधळण केली होती. त्यामुळे सोयाबीन हा निवडणुकीत महत्त्वाचा फॅक्टर ठरू शकतो, अशी शक्यता राजकीय विश्लेषक वर्तवत होते. त्यामुळे सोयाबीनच्या मुद्द्याचा निकालात काही परिणाम होतो का, ते पाहणं महत्त्वाचं ठरणार आहे.