Jalgaon News : खानदेशात मृग बहरातील केळी लागवड मे अखेरीस सुरू होणार आहे. अर्ली केळी लागवड जून व जुलैमध्ये अधिक होईल. यंदा केळी लागवड खानदेशात वाढू शकते. यंदा मृग बहर केळीची एकट्या जळगाव जिल्ह्यातील लागवड ५० ते ५२ हजार हेक्टरवर होईल, असा अंदाज आहे.

उशिराची लागवड ऑगस्टपर्यंत होईल, अशी स्थिती आहे. सर्वाधिक मृग बहर केळी पीक जळगावातील रावेरात राहील. तेथे सुमारे २२ ते २५ हजार हेक्टरवर मृग बहर केळी पीक राहणार आहे. केळीचे दर सध्या स्थिर आहे. केळीला चांगला पर्याय कृत्रीम जलसाठाधारकांकडे नाही.

यामुळे केळी लागवड कायम राहणार आहे. यंदा ती वाढू शकते, असा अंदाज आहे. सध्या दर्जेदार केळीला उठाव आहे. या काळात दर कमी झालेले नसल्याने पुढे लागवड कायम राहील. मृग बहर केळीचे उत्पादनही बऱ्यापैकी येत आहे. जळगाव जिल्ह्यात मृग बहर केळीची काढणी अलीकडेच अखेरिस सुरू झाली.

कांदेबाग केळीची काढणी गणेशोत्सव, दसरा सणापासून सुरू होत असते. सध्या पिलबाग, मृगबहर केळीची काढणी यावल, चोपडा, रावेर, जामनेर, नंदुरबारमधील अक्कलकुवा, शहादा भागात सुरू आहे. या केळीला किमान २००० व कमाल २२०० रुपये प्रति क्विंटलचा सरासरी दर मिळाला आहे. मृग बहर केळीची लागवड मे महिन्यात सुरू होते.

अर्ली लागवड मे महिन्याच्या दुसऱ्या आठवड्यात केली जाते. तर नियमित लागवड जूनपासून सुरू होते. खानदेशात मृग बहर केळीखालील क्षेत्र अधिक असते. तर कांदेबाग केळीखालील क्षेत्र कमी असते. कांदेबाग केळीची लागवड जळगाव जिल्ह्यातील चोपडा, जळगाव, पाचोरा, जामनेर भागात केली जाते. मृग बहरची लागवड जळगाव जिल्ह्यातील रावेर, यावल, मुक्ताईनगर, जामनेर, नंदुरबारमधील तळोदा, शहादा भागात केली जाते.

रोपांची मागणी

केळी लागवडीसाठी रोपांचे बुकिंग शेतकरी करीत आहेत. परंतु रोपांचे दर वाढले आहेत. यंदा खानदेशात मृग बहरातील केळीची लागवड सतत वाढत आहे. यंदा मृग बहर व कांदेबाग केळीची मिळून जळगावमध्ये ७५ ते ७८ हजार हेक्टरवर लागवड अपेक्षित आहे.