Parbhani News : कान्हडखेड (ता. पूर्णा) येथील बळीराजा साखर कारखान्याचा १० व्या गाळप हंगामाचा प्रारंभ बुधवारी (ता. १) कारखान्याचे संचालक दिनकरराव जाधव यांच्या हस्ते मोळी टाकून करण्यात आला.

यंदाच्या गाळप हंगामात ७ लाख टन ऊस गाळपाचे उद्दिष्ट आहे. फेब्रुवारी पर्यंत सर्व सभासदांचा ऊस गाळपास आणला जाईल. त्यानंतर कारखाना परीसरातील सर्व बिगर सभासदांचा ऊस आणला जाईल. त्यामुळे शेतकऱ्यांनी उसाची चिंता करु नये अशी ग्वाही यावेळी देण्यात आली.

यावेळी मदनराव वाघ, बाबुराव बोबडे, मारोती बखाल, ॲड. एम. ए. सईद, ॲड. सुरेश सूर्यवंशी, कारखान्याचे सरव्यवस्थापक भगवानराव मोरे, वर्क्स मॅनेजर तुकाराम सुरवसे, चिफ केमिष्ट किरण मगर, मुख्य शेतकी अधिकारी रमेश पौळ, इलेक्ट्रिक मॅनेजर नितीन गणोरकर, अभियंता मदन देशमुख, ऊस पुरवठा अधिकारी विनायक कऱ्हाळे, रामजी शिंदे, मुख्य सुरक्षा अधिकारी विनायक कदम उपस्थित होते.

मागील हंगामात ५ लाख ७२ हजार २५३ टन ऊस गाळप करुन सरासरी ११.८० टक्के उताऱ्याने ६ लाख ७५ हजार ७०० क्विंटल साखर उत्पादन घेतले होते. त्यानुसार एफआरपी दर प्रतिटन २७६४.७० रुपये ऊस उत्पादकांना अदा करण्यात आली.

या हंगामात शेतकऱ्यांच्या उसाला पहिली उचल प्रतिटन २२०० रुपये देण्यात येईल त्यानंतर बैलपोळा सणासाठी दुसरा हप्ता व दिवाळी पूर्वी तिसरा हप्ता निघालेल्या एफआरपी दरा प्रमाणे शेतकऱ्यांना देण्यात येईल.

मागील गळीत हंगामा पेक्षा या वर्षीच्या गळीत हंगामासाठी एफआरपी दर अंदाजे निश्चित चांगला राहील, असे कारखान्याचे अध्यक्ष शिवाजीराव जाधव यांनी सांगितले. सूत्रसंचालन माधवराव मोहीते यांनी केले तर आभार जगदीश जोगदंड यांनी मानले. शेतकरी, ऊसतोडणी वाहतूक ठेकेदार, पत्रकार व कर्मचारी उपस्थित होते.