Parbhani News : परभणी जिल्ह्यातील बालविवाह (child marriage) थांबविण्यासाठी जिल्हाधिकारी आंचल गोयल (Collector Anchal Goyal) यांच्या पुढाकारातून ‘बालविवाहमुक्त परभणी’ या अभियानाची सुरवात जानेवारी २०२३ मध्ये करण्यात आली.

जिल्हा यंत्रणेने यंदाच्या मार्च महिन्यात तब्बल ३५ बालविवाह रोखण्यात यश मिळविले आहे. चार प्रकरणांमध्ये ४० जणांविरोधात गुन्हे दाखल करण्यात आले आहेत.

जिल्ह्यातील ग्रामीण भागात बालविवाहमुक्त परभणी या अभियानाअंतर्गत जिल्हा यंत्रणेने चांगली कामगिरी बजावली असून आता शहरी भागातही अभियानाची प्रभावी अंमलबजावणी करण्याचे आदेश जिल्हाधिकारी आंचल गोयल यांनी बुधवारी (ता. ५) येथे आयोजित आढावा बैठकीत दिले.

जिल्हाधिकारी कार्यालयात आयोजित बैठकीला मुख्य कार्यकारी अधिकारी रश्मी खांडेकर, उपमुख्य कार्यकारी अधिकारी डॉ. संदिप घोन्सीकर, जिल्हा शल्य चिकित्सक डॉ. सुहास जगताप, जिल्हा आरोग्य अधिकारी डॉ. राहुल गिते, बालविकास अधिकारी कैलास तिडके, उपमुख्य कार्यकारी अधिकारी विशाल जाधव, प्रतिक्षा भुते, आशा गरुड उपस्थित होते.

मार्च महिन्यामध्ये बालविवाह निर्मूलन समितीला एकूण ४४ विवाहांची माहिती प्राप्त झाली. या माहितीनुसार समितीने विवाहांची खातरजमा केली. त्यापैकी पाच विवाहातील वधुचे वय हे १८ वर्षें पूर्ण असल्याचे समितीच्या निदर्शनास आले.

त्यापैकी उर्वरित ३५ बालविवाह थांबविण्यात बालविवाह निर्मूलन समितीला यश आले असून, त्यातील पालकांना बालकल्याण समितीसमोर हजर राहण्यासाठी पोलिस विभागाकडून नोटीस देण्यात आली.