Baramati News : बारामतीसह सुपे व उंडवडी परिसरात आठ-दहा दिवसांपासून युरियाची मोठ्या प्रमाणावर टंचाई निर्माण झाली आहे. मात्र ही टंचाई कृत्रिम असल्याचा शेतकऱ्यांचा आरोप आहे.

गेल्या काही दिवसांपासून शेतकरी बारामतीसह सुपे व उंडवडी परिसरात काही दुकानांची माहिती घेत होते, तेव्हा इतर दुय्यम खते घेतली, तरच युरिया मिळेल, अशा स्वरूपाचे लिंकिंगचे प्रकार सुरू आहेत. काही खत विक्री करणारे दुकानदार युरिया शिल्लक नसल्याचे सांगून शेतकऱ्यांना परत पाठवीत आहे. त्यामुळे शेतकऱ्यांमध्ये तीव्र नाराजी आहे.

याबाबत उंडवडी कडेपठारचे माजी सरपंच विठ्ठल जराड यांनी विभागीय कृषी सहसंचालक विभाग पुणे यांच्याकडे बारामती येथील खत विक्रेत्याची लेखी तक्रार केली आहे. त्यानंतर तालुका कृषी कार्यालय ॲक्शन मोडमध्ये आले आहे. यानंतर तालुका कृषी अधिकारी सुप्रिया बांदल यांनी संबंधित दुकानाची तपासणी करून संबंधित खत विक्रेत्याला नोटीस देऊन खुलासा मागितला आहे.

बाबुर्डी येथील शेतकरी राजकुमार लव्हे यांनी सुपे येथील काही कृषी सेवा केंद्रांत युरिया असून देखील मिळत नसल्याची तक्रार बांदल यांच्याकडे केली. त्यानंतर बांदल यांनी संबंधित दुकानाची तपासणी केली. यामध्ये २०० पेक्षा अधिक पिशव्या युरिया आढळून आला. दरम्यान, तालुका कृषी अधिकाऱ्यांनी धाड टाकल्याचे समजताच काही दुकानदार दुकाने बंद करून निघून गेले.

दोनच दुकानात त्यांना तब्बल ४ टन युरिया शिल्लक आढळला. त्याच्या पंचनामे करण्याच्या सूचना दिल्या गेल्या. दरम्यान दुपारी उशिरापर्यंत कृषी विभागाची कारवाई सुरूच होती. सुपे परिसरात सात ते आठ खत विक्रेते असल्याने कारवाईला वेळ लागेल, असे कृषी खात्याच्या सूत्रांनी सांगितले.