Jalgaon News : खानदेशात मका पिकाची लागवड यंदा वाढली आहे. पण पिकात अमेरिकन लष्करी अळीचा प्रकोपही यंदा अधिक आहे. पिकात किडनाशकांच्या फवारण्या घ्याव्या लागत असून, त्यात उत्पादन खर्चही वाढला आहे. सध्या एक ते दोन महिने कालावधीच्या पिकात लष्करी अळी दिसत आहे.

यंदा हरभरा, ज्वारीपेक्षा अधिक मक्याची लागवड खानदेशात झाली आहे. ही लागवड जळगावात सुमारे एक लाख दोन हजार हेक्टरवर झाली आहे. तसेच धुळ्यातील शिंदखेडा, शिरपूर, साक्री आणि नंदुरबारमधील नवापूर, तळोदा, शहादा भागातही बऱ्यापैकी लागवड झाली आहे.

मक्याला मागील दोन हंगाम बऱ्यापैकी दर मिळाले आहेत. मागील खरीप व रब्बी हंगामातही मका लागवड बऱ्यापैकी होती. कारण दर चांगले राहीले. या हंगामातही दर व विपणन व्यवस्था लक्षात घेऊन शेतकऱ्यांनी लागवड केली आहे. परंतु पिकात लष्करी अळीचा प्रकोप वाढला आहे.

हा प्रकोप दोन फवारण्या घेऊनही काही भागात थांबलेला नाही. एका फवारणीसाठी एकरी किमान १२०० ते १३०० रुपये खर्च येत आहे. तसेच मजुरी खर्चही लागत आहे. लष्करी अळीमुळे पिकाची हानी झाली आहे.

त्यात सुरवातीलाच १५ ते २० टक्के नुकसान झाले आहे. फवारणी वेळेत न घेतल्यास नुकसानीची पातळीही वाढत आहे. तसेच फवारणीचा खर्च पुढे अधिक करावा लागतो. फवारणीत किडनाशके किंवा अळीनाशकांसह संप्रेरके, अन्नद्रव्येदेखील फवारावी लागत आहेत.

कारण अळीमुळे पिकाची वाढ कमी होते. त्याची पुढे वाढ होऊन वेळेस निसवणी व कापणीदेखील आवश्यक आहे. यामुळे शेतकरी त्यात संप्रेरके व अन्नद्रव्ये आदींची फवारणीदेखील घेत आहेत.