Parbhani News : रब्बी हंगामास प्रारंभ झाला असून यंदाही शेतकऱ्यांचा कल हरभरा पेरणीकडे अधिक असल्याचे दिसून येऊ लागले आहे. जिल्ह्यातील काही भागांत हरभरा पेरणीस सुरुवातही झाली असून आतापर्यंत जवळपास २० टक्के क्षेत्र हरभरा पेरणीखाली आले आहे. गत वर्षी ७२ टक्के क्षेत्र हरभऱ्याखाली आले होते.

जिल्ह्यात रब्बी पिकाचे १ लाख ४७ हजार हेक्टर सरासरी क्षेत्र आहे. सोयाबीन निघाल्यानंतर रब्बी हंगामास साधारणतः प्रारंभ होतो. सोयाबीन काढणीस सुरुवात झाली असून काही भागांत उत्पादनाची सरासरी मिळत नसल्याने येणारा खर्च बघता मोडून टाकले आहे. या भागात आता रब्बीच्या पेरणीने जोर धरला आहे.

रब्बी हंगामात गहू व हरभरा, ही दोन मुख्य पिके घेतली जातात. गव्हाचे पीक हाती येण्यास लागणारा कालावधी व सिंचनाची सोय यामुळे सरासरी क्षेत्र कमी राहत आले आहे. गत वर्षी २८ टक्के क्षेत्रात गव्हाची पेरणी होती.

कमी कालावधीत, कमी पाण्यात व खर्चात हरभरा येत असल्याने शेतकऱ्यांची पहिली पसंती हरभऱ्यास मिळू लागली आहे. बाजारात हरभऱ्यास दरही बऱ्यापैकी मिळत असल्याने पेरणीचा ट्रेंड बदलला आहे. दर वर्षी हरभऱ्याखालील पेरणीक्षेत्रात वाढ होत आहे.

आतापर्यंत २० टक्के क्षेत्र लागवडीखाली

यावर्षीही हरभऱ्याखालील पेरणीक्षेत्र वाढणार असल्याचे शेतकऱ्यांच्या पसंतीवरून दिसून येऊ लागले आहे. हरभऱ्यास बाजारात चांगला भाव मिळत असल्याने त्याकडे कल वाढला आहे.

गत हंगामात हरभऱ्यास सात हजारी दर मिळाला आहे. आतापर्यंत जिल्ह्यात वीस टक्के क्षेत्र हरभऱ्याखाली आले असल्याचा कृषी विभागाचा अंदाज आहे. गत वर्षी १ लाख ९ हजार हेक्टरमध्ये पेरणी होती. त्यामध्ये वाढ होण्याचा अंदाज आहे.