Ahilyanagar News: राजमाता पुण्यश्लोक अहिल्यादेवी होळकर यांच्या त्रिशताब्दी जयंती वर्षाचे औचित्य साधून त्यांनी उभारलेल्या विविध बाबींचे संवर्धन करण्याचा निर्णय राज्य मंत्रिमंडळाने मंगळवारी (ता. ६) घेतला. तसेच राज्यातील विविध तीर्थक्षेत्रांच्या जतन आणि संवर्धनासाठी ५५०३ कोटी रुपयांच्या निधीला मंजुरी देण्यात आली. तसेच, अहिल्यानगर येथे शासकीय वैद्यकीय महाविद्यालय, राहुरी येथे वरिष्ठस्तर दिवाणी न्यायालय करण्याला मंत्रिमंडळाने मान्यता देण्यात आली असल्याची माहिती मुख्यमंत्री देवेंद्र फडणवीस यांनी दिली.

राजमाता पुण्यश्लोक अहिल्यादेवी होळकर यांच्या ३०० व्या जयंती सोहळा उत्सवाच्या निमित्ताने मंगळवारी (ता. ६) अहिल्यादेवी होळकरांचे जन्मगाव असलेल्या चौंडी (ता. जामखेड, जि. अहिल्यानगर) येथे विधान परिषदेचे सभापती प्रा. राम शिंदे यांच्या पुढाकाराने मंत्रिमंडळाची बैठक झाली. या बैठकीत झालेल्या निर्णयाची मुख्यमंत्री देवेंद्र फडणवीस यांनी माहिती दिली. उपमुख्यमंत्री एकनाथ शिंदे व अजित पवार विधान परिषदेचे सभापती राम शिंदे, महसूलमंत्री चंद्रशेखर बावनकुळे या वेळी उपस्थित होते.

बैठकीत झालेले प्रमुख निर्णय

अहिल्यादेवी यांच्या चोंडी येथील स्मृतिस्थळाचे जतन व संवर्धन करण्यासाठी ६८१ कोटींच्या आराखड्याला मान्यता.

तीर्थक्षेत्र जतन व संवर्धनासाठी राज्यातील अष्टविनायक मंदिरासाठी १४७ कोटी, तुळजाभवानी मंदिर विकास आराखड्यासाठी १८६५ कोटी, ज्योतिबा मंदिर विकास आराखड्यासाठी २६९ कोटी, त्र्यंबकेश्वर मंदिर विकास आराखड्यासाठी २७५ कोटी, महालक्ष्मी मंदिर विकास आराखड्यासाठी १४४५ कोटी, माहूरगड मंदिर विकास आराखड्यासाठी ८२९ कोटी रुपये खर्चाच्या तरतुदीला मान्यता.

अहिल्यानगर जिल्ह्यात शासकीय वैद्यकीय महाविद्यालय तसेच राहुरी येथे वरिष्ठ स्तर दिवाणी न्यायालय, खास मुलींसाठी स्वतंत्र औद्योगिक प्रशिक्षण संस्था (आयटीआय) होणार.

अहिल्यादेवी होळकर यांच्या जीवन कार्याचा परिचय देणारा बहुभाषिक व अद्ययावत तंत्रज्ञानाच्या वापरातून चित्रपट निर्मिती करणार.

महिलांसाठी सक्षमीकरण आदिशक्ती अभियान, जनजागृती, महिला व संस्थांना आदिशक्ती पुरस्कार योजना.

धनगर समाजातील विद्यार्थ्यांना मोठ्या शाळेत शिकण्यासाठी यशवंत विद्यार्थी योजना व त्यातून सुमारे दहा हजार विद्यार्थ्यांना शिक्षण देणे.

दहावीनंतर गुणवत्ताधारक विद्यार्थ्यांना शिकण्यासाठी पुण्यश्लोक अहिल्यादेवी होळकर विभाग स्तरावर वस्तीग्रह योजना. पुणे व नागपूर येथे याचे काम तातडीने सुरू होत आहे. मुलांसाठी व मुलींसाठी स्वतंत्र वसतिगृह.

अहिल्यादेवी होळकर यांच्या शताब्दी जन्मोत्सवानिमित्त प्रेरणा गीत, पोस्टाचे तिकीट व त्रिशताब्दी लोगो प्रसारण.

नाशिक येत असलेल्या कुंभमेळ्याच्या पार्श्वभूमीवर प्रयागराजच्या धरतीवर कुंभमेळा प्राधिकरण कायदा.

चांदवड, जेजुरी येथील मल्हार गौतमेश्वर व त्र्यंबकेश्वर येथील प्राथमिक विहिरी सहा घाट सहा कुंड ३४ जलाशयाचा समावेश.

राज्य शासनाने राबवलेल्या शंभर दिवसाच्या कार्यक्रमानंतर आता सहा मे ते २ ऑक्टोबर या कालावधीत १५० दिवसांचा कार्यक्रम प्रत्येक विभागाला विकसित महाराष्ट्र २०१७ अंतर्गत विभागाचा रोड मॅप

सर्व कार्यालय शंभर टक्के ई गव्हर्नर आणि सेवाविषयक प्रशासकीय सुधारणा असेल.