Pune News : कांदा निर्यात बंदी जैसेथे असतानाच केंद्र सरकारने संयुक्त अरब अमिरातीला (युएई) कांदा निर्यात करण्याचा निर्णय घेतला आहे. याबाबत वाणिज्य मंत्रालयाने अधिसूचना काढली असून अतिरिक्त १० हजार टन कांदा निर्यात करण्यास मान्यता दिली आहे. याआधी वाणिज्य मंत्रालयाच्या अधिसूचनेनुसार, केंद्र सरकारने ६४,४०० टन कांदा निर्यात करण्यास परवानगी दिली होती.
दरम्यान देशातील कांद्याच्या वाढत्या किमतींवर नियंत्रण मिळवण्यासाठी ८ डिसेंबर २०२३ रोजी सरकारने कांद्याच्या निर्यातीवर बंदी घातली होती. तसेच ३१ मार्चपर्यंत कांद्याची निर्यात बंदी कायम राहील, असे स्पष्ट केले होते. पण लोकसभा निवडणुका घोषित झाल्यानंतर वाणिज्य मंत्रालयाने २२ मार्चला अधिसूचना काढत कांद्यावरील निर्यातबंदी पुढील सूचनेपर्यंत अशीच राहिल असे जाहीर केले.
अतिरिक्त कांदा निर्यात
वाणिज्य मंत्रालयाने बुधवारी (ता. ०३) कांदा निर्यातीबाबत अधिसूचना काढली. यात युएईला अतिरिक्त १० हजार टन कांदा निर्यात केली जाईल, असे स्पष्ट केले आहे. तसेच ही निर्यात नॅशनल कोऑपरेटिव्ह एक्सपोर्ट्स लिमिटेड (NCEL) मार्फत करण्यात येईल, असेही अधिसूचनेत स्पष्ट करण्यात आले आहे.
३ लाख मॅट्रिक टन कांदा निर्यात
तर याआधी केंद्रीय गृहमंत्री अमित शाह यांच्या अध्यक्षतेखाली मंत्र्यांच्या समितीने (१८ फेब्रुवारी २०२३) कांद्याच्या निर्यातीला मंजुरी दिली होती. याप्रमाणे केंद्र सरकारने ३ लाख मॅट्रिक टन कांदा निर्यातीला मंजूरी दिली.
कांदा निर्यात करण्यास परवानगी
वाणिज्य मंत्रालयाच्या अधिसूचनेनुसार, भारत सरकारने नॅशनल कोऑपरेटिव्ह एक्सपोर्ट्स लिमिटेड (NCEL) मार्फत संयुक्त अरब अमिराती आणि बांगलादेशला ६४,४०० टन कांदा निर्यात करण्यास परवानगी दिली होती. यात भूतानला ५५० टन, बहरीनला तीन हजार टन, मॉरिशसला १२०० टन, बांगलादेशसाठी ५०,००० टन, संयुक्त अरब अमिरातीला १४,४०० टन कांदा निर्यातीला परवानगी देण्यात आली होती. यात आता अतिरिक्त १० हजार टन कांदा निर्यात होणार आहे.
५ लाख टन कांदा खरेदीचे निर्देश
तसेच रब्बी हंगामातील कांद्याच्या होणारी अवक लक्षात घेऊन सरकारने एनसीसीएफ आणि नाफेड या सरकारी एजन्सीजला शेतकऱ्यांकडून ५ लाख टन कांदा खरेदी करण्याचे निर्देश दिले आहेत. तसेच कांदा खरेदी करण्यासाठी दोन्ही एजन्सीजना प्रथम कांदा उत्पादत शेतकऱ्यांची नोंदणी करावी लागणार आहे. तर कांदा खरेदीपोटीची रक्कम थेट शेतकऱ्यांच्या बँक खात्यात जमा करण्यात येणार आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.