Nashik News : राज्यात रविवारी झालेल्या गारपीटीसह अवकाळी पावसामुळे द्राक्ष पिकासह कांदा, कापूस, तूर, पालेभाज्या पिकांचे मोठे नुकसान झाले. आज मदत व पुनर्वसन मंत्री अनिल पाटील यांनी नाशिक जिल्ह्याच्या निफाड तालुक्यातील नुकसानीची पाहणी केली. अवकाळी पावसामुळे झालेल्या शेतपिकांच्या नुकसानीचे येत्या दोन दिवसांत पंचनामे पूर्ण करण्याचे निर्देश संबंधित अधिकाऱ्यांना दिले.

राज्य सरकार शेतकऱ्यांच्या पाठीशी खंबीरपणे उभे असून त्यांना सर्वतोपरी मदत करण्यात येईल, असा दिलासा मंत्री पाटील यांनी शेतकऱ्यांना दिला.

दरम्यान, उपमुख्यमंत्री अजित पवार यांनी आज मुंबईत राज्यातील गारपिटीने आणि अवकाळीने (Unseasonal Rain) नुकसानीचा आढावा घेण्यासाठी तातडीची बैठक बोलावली आहे. या बैठकीला कृषिमंत्री धनंजय मुंडे, अनिल पाटील व अधिकारी उपस्थित राहणार आहेत. या बैठकीत केंद्र सरकारकडून अवकाळी आणि गारपिटीने फटका बसलेल्या शेतीला मदत मिळवण्यासाठी मंत्रिमंडळ बैठकीनंतर प्रस्ताव पाठवण्यात येणार आहे.

मुख्यमंत्री एकनाथ शिंदे यांनी काल सर्व जिल्हाधिकाऱ्यांना पुढील १० दिवसात राज्यातील नुकसान झालेल्या भागाचे पंचनामे तयार करून अहवाल सादर करण्याचे आदेश दिले आहे. त्यानंतर आज सकाळपासून नुकसानग्रस्त भागामध्ये कृषी विभागाच्यावतीने पंचनाम्यास सुरूवात झाली आहे.