Yavatmal / Akola News : शेतकऱ्यांप्रति असंवेदनशील व अपमानजनक वक्‍तव्य केल्याचा आरोप करीत शिवसेना (उद्धव ठाकरे) पक्षाच्या वतीने आर्णी येथील शिवनेरी चौकात रविवारी (ता. ६) कृषिमंत्री माणिकराव कोकाटे यांचा प्रतिकात्मक पुतळा फासावर लटकवीत आंदोलन करण्यात आले. त्याचबरोबर अकोला जिल्ह्यातील बार्शीटाकळी तालुक्यातील बहिरखेड फाटा येथे शेतकऱ्यांनी कृषिमंत्र्यांच्या फोटोला ‘चपला मारो’ आंदोलन केले.

कर्जमाफीच्या रकमेचा उपयोग शेतकऱ्यांद्वारे लग्न, साखरपुड्यावर केला जात असल्याचे कथित व्यक्‍तव्य कृषिमंत्री माणिकराव कोकाटे यांनी केले होते. कर्जमाफीच्या अपेक्षेने दहा-दहा वर्षे कर्जाची परतफेड केली जात नाही. मात्र कर्जमाफीनंतर ही अशा पैशाचा उपयोग शेतीकामी केला जात नाही, असेही श्री. कोकाटे म्हणाले होते.

शिवसेना (उबाठा) पक्षाच्या वतीने त्यांच्या या वक्‍तव्याचा निषेध करण्यात आले. शिवसेना (उबाठा) पक्षाचे जिल्हाप्रमुख प्रवीण शिंदे, आर्णी तालुका प्रमुख उज्ज्वल मोरे, पंकज शिवरामवार, रमेश ठाकरे, पवन वाघमारे, दिनेश पवार, आनंद शिंदे, गोकुठ शिंगघर, प्रमोद शिंदे, गोविंद बिस्मोरे या आंदोलनात सहभागी झाले होते.

बार्शीटाकळी तालुक्यातील बहिरखेड फाटा येथे आंदोलनात किरण ठाकरे, महादेव गावंडे, अविनाश ठाकरे, प्रल्हाद माळकर, गणेश ताठे, दिलीप घुमसे, मनोहर कमानदार, जनार्दन ठोकळ, सुरेश वानखडे, स्वप्निल ठाकरे, अनंता घुमसे, मंगेश सोनटक्के, देविदास ठाकरे आदी उपस्थित होते.

राजीनाम्याची मागणी

या वेळी शिवसैनिकांनी आक्रमक होत शेतकऱ्यांविरोधात वारंवार बेताल वक्‍तव्य करणाऱ्या कृषिमंत्री माणिकराव कोकाटे यांचा राजीनामा घेण्यात यावा, अशी मागणी केली. मुख्यमंत्र्यांमध्ये थोडीजरी नैतिकता असेल तर त्यांनी हे काम तत्काळ करावे, असेही शिवसैनिकांचे म्हणणे होते.