Amaravati News : चंद्रपूरबरोबरच आता अमरावती हे विदर्भातील अनधिकृत बियाणे पुरवठ्याचे केंद्र झाल्याची शक्‍यता वर्तविली जात आहे. गेल्या आठवडाभरात जिल्ह्यात सुमारे ५० लाखांचा अनधिकृत बियाणे साठा जप्त करण्यात आला. त्याच श्रृंखलेत अचलपूर कृषी उपविभागाअंतर्गत पिंपळोद येथील छापेमारीत ११ लाख ९८ हजारांचा बियाणे साठा आढळून आला.

विदर्भाचे मध्यवर्ती ठिकाण असल्याने अमरावतीमधून विदर्भात सर्वदूर अनधिकृत बियाणे पोहोचविणे शक्‍य होते. त्यामुळेच अनधिकृत बियाणे तस्करांनी अमरावतीवर लक्ष्य केंद्रित केले आहे. चंद्रपूर हे आंध्र प्रदेश, तेलंगणाच्या सीमेवर आहे. परिणामी त्या राज्यांतून अनधिकृत बियाण्यांची खेप दरवर्षी विदर्भात दाखल होते.

यंदा मात्र त्या भागात कृषी विभागाच्या कारवायांची गती मंदावल्याने शंका व्यक्‍त होत आहे. दुसरीकडे अमरावती जिल्ह्यात मात्र कृषी विभागाने बियाणे तस्करांवर कारवाईला वेग दिला आहे. अशाच एका कारवाईत अचलपूर उपविभागीय कृषी अधिकारी प्रफुल्ल सातव, दर्यापूर तालुका कृषी अधिकारी आरती साबळे, कृषी सहायक प्रशांत हाडोळे, आनंद गावंडे, अशोक मोहोरकार, किरण बोरेकर, वाहन चालक सचिन चवरे यांच्या पथकाने अनधिकृत बियाणे साठा जप्त केला.

पिंपळोद येथील प्रशांत नवलकार हे अनधिकृत बियाण्यांची साठवणूक व विक्री करीत असल्याची माहिती कृषी विभागाला मिळाली होती. त्याआधारे पथकाने त्यांच्या घर व गोदामाची झडती घेतली.

या वेळी त्यांच्या घर व गोदामात १३३० बियाणे पाकिटांचा साठा मिळून आला. जप्त करण्यात आलेल्या या बियाण्याची किंमत ११ लाख ९८ हजार ३३० रुपये आहे.