Buldhana News : दोन दिवसांपूर्वी झालेल्या गारपीट, वादळामुळे या भागातील अनेक गावांत शेडनेटमध्ये बीजोत्पादन घेणारे शेतकरी उघड्यावर आले आहेत. या भागात बुधवारी (ता.२९) विरोधी पक्षनेते अंबादास दानवे यांनी भेट देत शेतकऱ्यांना धीर देण्याचा प्रयत्न केला.

या वेळी शेतकऱ्यांना अश्रू अनावर झाले. ‘‘शेतकऱ्यांना न्याय मिळवून देण्यासाठी सरकारला जाब विचारणार,’’ असे आश्‍वासन विधान परिषदेचे विरोधी पक्ष नेते अंबादास दानवे यांनी शेतकऱ्यांना दिले.

सिंदखेडराजा तालुक्यातील पळसखेड चक्का गावात नुकसान झालेल्या शेडनेटची, पिकांची दानवे यांनी पाहणी केली. यानंतर शेतकऱ्यांशी बोलताना ते म्हणाले, ‘‘शेतकरी हा लाखोंचा पोशिंदा आहे.

परंतु नैसर्गिक आपत्तीमुळे शेतकरी अडचणीत आला आहे. गारा आणि पावसाने मोठे नुकसान केले आहे. शेतकऱ्यांच्या शेडनेटला विम्याचे संरक्षण नसल्याने त्यांना नुकसान भरपाई मिळत नाही, ही दुर्दैवी बाब आहे. येणाऱ्या अधिवेशनामध्ये या संदर्भात आवाज उठवणार आहे.’’

‘‘मागील दोन तीन दिवसांतील पावसामुळे हरभरा, कापूस, गहू व तूर यासह फळबागांचे मोठे नुकसान झाले आहे. सिंदखेडराजा, देऊळगावराजा या भागात गारांचा पाऊस झाला. त्यामुळे शेडनेटचे प्लॉट जमीनदोस्त झाले.

शेतकऱ्यांचे कोट्यवधी रुपयांचे नुकसान झाले. बियाणे कंपन्यांनी हात वर केल्यामुळे शेतकरी अडचणीत सापडला आहे. या शेतकऱ्यांच्या भरोशावर बियाणे कंपन्या मोठ्या होतात. परंतु त्यांना नुकसानीच्या काळात मदत करीत नाहीत. यासंदर्भातही हिवाळी अधिवेशनामध्ये सरकारला प्रश्न विचारू,’’ असा विश्‍वास दानवे यांनी दिला.

शिवसेनेचे (ठाकरे गट) उपनेते लक्ष्मण वडले, संपर्क प्रमुख नरेंद्र खेडेकर, जिल्हाप्रमुख जालिंदर बुधवत, उपविभागीय अधिकारी समाधान गायकवाड, तहसीलदार सचिन जैस्वाल, प्रभारी कृषी तालुका अधिकारी भागवत किंगर उपस्थित होते.

शेतकऱ्यांना अश्रू अनावर

अंबादास दानवे यांनी पळसखेड चक्का गावात भेट देऊन शेतकऱ्यांच्या व्यथा जाणून घेतल्या. या वेळी शेतकऱ्यांनी अनेक अडचणी सांगितल्या. व्यथा मांडत असताना शेतकरी बालाजी सोसे यांना अश्रू अनावर झाल्याचे पाहायला मिळाले. स्थानिक महिला शेतकऱ्यांनी देखील अनेक समस्या दानवे यांच्यासमोर मांडल्या.