AI In Agriculture : ऊस पिकातील कृत्रिम बुद्धिमत्तेच्या (एआय) वापरासाठी शेतकऱ्यांना हेक्टरी २५ हजार रुपये कर्ज देण्याची घोषणा राज्याचे उपमुख्यमंत्री अजित पवारांनी सोमवारी (ता.९) केली आहे. परंतु कर्जाची वेळेत परतफेड केली नाही, तर १२ टक्के व्याज आकरण्यात येईल, अशी माहितीही उपमुख्यमंत्री पवारांनी दिली आहे. ते वसंतदादा शुगर इन्स्टिट्यूट येथील कार्यक्रमात बोलत होते.

यावेळी अजित पवारांनी ठिबक ऊसासाठी १० हजार बिनव्याजी कर्ज देणार असल्याचं सांगितलं. "ऊस पिकातील कृत्रिम बुद्धिमत्तेसाठी हेक्टरी २५ हजार रुपये देणार आहोत. त्यामध्ये ठिबकवर ऊस असेल तर कृत्रिम बुद्धिमत्तेसाठी हेक्टरी १० हजार रुपये बिनव्याजी कर्ज देणार आहोत. ९ हजार रुपये वसंतदादा शुगर इन्स्टिट्यूट आणि उर्वरित रक्कम कारखाना देईल." असंही पवार म्हणाले.

राज्यातील ऊस शेतकऱ्यांसाठी कृत्रिम बुद्धिमत्तेच्या वापरासाठी ६ टक्के व्याजदराने राज्य सहकारी बँक ५०० कोटी रुपये साखर कारखान्यांना देणार असल्याचं महाराष्ट्र राज्य सहकारी बॅंकेचे प्रशासक विद्याधर अनास्कर यांनी सांगितलं. त्यावर या निधीचा वापर कृत्रिम बुद्धिमत्तेसाठी वापरा अन्यथा कारखान्यांवर कारवाई करण्यात येईल, अशी तंबी उपमुख्यमंत्री अजित पवारांनी दिली.

तसेच कृषी विद्यापीठांनी शंभर एकरवर ऊस बेणे प्लॉट एआयवर करण्यासाठी प्रोत्साहन देण्याची सूचना अजित पवारांनी केली. तर राज्याचे सहकार मंत्री बाबासाहेब पाटील यांनी एआयसाठी शेतकऱ्यांना अर्थसहाय्याचा आजच शासन निर्णय काढणार असल्याचं सांगितलं.

दरम्यान, ऊस शेतीत एआयला प्रोत्साहन देण्यासाठी यंदाच्या अर्थसंकल्पात ५०० कोटी रुपयांची तरतूद केली आहे. तसेच राज्य सरकारकडून कृषी क्षेत्रात एआयचा वापर करण्यासाठी धोरण निर्मिती सुरू आहे. अलीकडेच राज्याचे कृषिमंत्री माणिकराव कोकाटे यांनी कृषी क्षेत्रात एआयचा वापर करण्यासाठी कर्जपुरवठा करण्याची माहिती दिली होती.