Baramati News : ‘‘कृत्रिम बुद्धिमत्ता व अत्याधुनिक तंत्रज्ञानाद्वारे (एआय) ऊस उत्पादनात क्रांती होणार आहे. ही प्रणाली कमी कालावधीत गतीने महाराष्ट्रातील ऊस उत्पादकांपर्यंत पोहोचावी, यासाठी वसंतदादा शुगर इन्स्ट्यिट्यूट (व्हीएसआय) आणि बारामती कृषी विज्ञान केंद्र (केव्हीके) शरद पवार यांच्या नेतृत्वाखाली यापुढे जोमाने काम करणार आहे. त्या पार्श्वभूमीवर कमी खर्चात अधिक उत्पन्न देणारी आश्चर्यकारक ‘एआय ऊस शेती’ बारामती कृषी विज्ञान केंद्राचे काम समाधान देणारे आहे,’’ अशी माहिती राष्ट्रवादी काँग्रेस (शरदचंद्र पवार गट) पक्षाचे प्रदेशाध्यक्ष जयंत पाटील यांनी स्पष्ट केली.

अॅग्रीकल्चरल डेव्हलपमेंट ट्रस्ट बारामती संचलित कृषी विज्ञान केंद्राच्या कार्यस्थळावर उभारण्यात आलेल्या कृत्रिम बुद्धिमत्ता व अत्याधुनिक तंत्रज्ञानाद्वारे (एआय) ऊस उत्पादनाचा प्रकल्प समजून घेण्यासाठी ‘व्हीएसआय’चे संशोधक व अधिकाऱ्यांबरोबर शुक्रवारी ज्येष्ठ नेते शरद पवार, जयंत पाटील, सुप्रिया सुळे, राजेंद्र पवार उपस्थित होते. या वेळी श्री. पाटील यांनी पत्रकारांशी संवाद साधताना बोलत होते.

जयंत पाटील म्हणाले, की कृत्रिम बुद्धिमत्तेचा प्रभावी वापर कृषी क्षेत्रात झाला, तर त्याचे सकारात्मक परिणाम आगामी काळात दिसून येतील. ‘एआय’मुळे ऊस उत्पादनात क्रांती होणार आहे. ऊस लागवडीखालील क्षेत्रफळामध्ये भारत सर्वांत मोठा देश असला तरी हेक्टरी उत्पादकतेमध्ये ब्राझील देशाच्या तुलनेत मागे आहे.

अगदी भारतातही तमिळनाडूपेक्षाही महाराष्ट्र ऊस उत्पादकतेत पिछाडीवर आहे. त्यामागे जमिनीची कमी सुपीकता, अयोग्य व्यवस्थापन पद्धती, गुणवत्तापूर्ण बेण्याची कमतरता, खत व पाण्याचा असंतुलित वापर, वातावरण बदल, कीड व रोगांचा वाढत चाललेला प्रादुर्भाव, अयोग्य वेळी तोडणीमध्ये घटणारे वजन अशी अनेक कारणे आहेत. या समस्यांवर मात करण्याच्या उद्देशाने ऊस शेतीत कृत्रिम बुद्धिमत्ता (एआय) तंत्राचा वापर करण्यासंदर्भात बारामती कृषी विज्ञान केंद्रात आश्चर्यकारक काम झाले आहे.

‘एआय’ तंत्रज्ञानावर बारामतीत आज कार्यशाळा

साखर उद्योगाला नवी झळाळी प्राप्त करून देण्यासाठी आर्टिफिशियल इंटेलिजन्स, अर्थात कृत्रिम बुद्धिमत्तेचा प्रभावी वापर करण्यासाठी वेस्ट इंडियन शुगर मिल्स असोसिएशन व बारामती येथील अॅग्रिकल्चरल डेव्हलपमेंट ट्रस्ट यांच्या संयुक्त विद्यमाने ‘कृत्रिम बुद्धिमत्तेचा भरघोस ऊस उत्पादनाची किमया व साखर उद्योगाचे आधुनिकीकरणासाठी वापर’ या विषयावरील कार्यशाळेचे आयोजन आज(ता.१५) करण्यात आले आहे. ही कार्यशाळा शारदानगर येथील मंथन सभागृह येथे सकाळी १० ते दुपारी ४.३० वाजेपर्यंत होणार आहे.