Manikrao Kokate Sessions Court : जिल्हा न्यायालयाच्या शिक्षेला आव्हान देण्यासाठी राज्याचे कृषिमंत्री माणिकराव कोकाटे यांनी सत्र न्यायालयात धाव घेतली आहे. सत्र न्यायालयात कृषिमंत्री कोकाटे अपील दाखल करणार आहेत. या अपीलवर दुपारी सुनावणी होण्याची शक्यता आहे.

सरकारी सदनिका लाटल्या प्रकरणी जिल्हा न्यायालयाने कोकाटे यांना २ वर्ष कारावास आणि ५० हजार रुपयांची शिक्षा सुनावली आहे. त्यामुळे आता सत्र न्यायालयात कोकाटे यांना दिलासा मिळेल की अडचणीत वाढ होईल, याकडे लक्ष लागून आहे.

या प्रकरणात माणिकराव कोकाटे यांची बाजू वकील अविनाश भिडे मांडणार आहेत. वकील भिडे म्हणाले, "२० तारखेला कॅबिनेट मंत्री माणिकराव कोकाटे यांच्याबाबत जे जजमेंट दिलं आहे. त्याबाबत आपण आज अपील करणार आहे. ऑनलाईन सबमिशन दाखल केलं जाणार आहे. त्यानुसार सुनावणी निश्चित होईल. न्यायालयाने जे जजमेंट दिलं आहेत. त्यावर आपण अपील करतोय. तांत्रिक मुद्दे आत्ताच सांगू शकत नाही. आज लवकर सर्क्युलेशन झालं तरच सुनावणी होईल." असंही वकील भिडे यांनी सांगितलं.

राज्याचे कृषिमंत्री माणिकराव कोकाटे सदानिका प्रकरणात गोत्यात आले आहेत. माणिकराव कोकाटे आणि त्यांचे बंधु विजय कोकाटे यांनी अर्थिक उत्पन्न कमी असल्याचं दाखवत मुख्यमंत्री कोट्यातून १९९५ साली सरकारी सदनिका लाटल्या प्रकरणी जिल्हा न्यायालयाने शिक्षा ठोठवली आहे. त्यामुळे विरोधकांकडून कोकाटे यांच्या राजीनाम्याची मागणी केली जात आहे. राष्ट्रवादी कॉँग्रेसचे सलग दुसरे कृषिमंत्री गोत्यात आल्याने महायुती सरकारची कोंडी झाली आहे.

नाशिक शहरात माणिकराव कोकाटे यांनी ३० वर्षापूर्वी कमी उत्पन्न गटातून सरकारी सदनिका मिळवली. त्यावेळी त्यांचे बंधू विजय कोकाटे, पोपट सोनवणे आणि प्रशांत गोवर्धने या चौघांनी कॅनडा कॉर्नर भागात व्ह्यू अपार्टमेंटमध्ये चर सदानिका मिळवल्या. परंतु तत्कालीन राज्यमंत्री तुकाराम दिघोळे यांनी तक्रार केली.

या तक्रारीवरुन तत्कालीन जिल्हाधिकाऱ्यांनी सदनिका वाटपाची चौकशी केली. तसेच गुन्हा दाखल होता. या प्रकरणाचा ३० वर्षांनंतर नाशिक जिल्हा न्यायालयाने निकाल दिला. या निकालात माणिकराव कोकाटे आणि त्यांचे बंधू यांना २ वर्षांचा कारावास आणि ५० हजारांची दंडाची शिक्षा सुनवण्यात आली. त्यामुळे कृषिमंत्री यांच्या अडचणी वाढल्या. त्यातच विरोधकांकडून कोकाटे यांच्या राजीनाम्याची जोरदार मागणी केली जात आहे.

दरम्यान, महायुती सरकारचे दोन कॅबिनेट मंत्री पहिल्या तीन महिन्यातच अडचणीत आले आहेत. त्यामुळे विरोधकांकडून दोन्ही मंत्र्यांच्या राजीनाम्याची मागणी केली जात आहे. त्यामुळे महायुती सरकारच्याही अडचणीत वाढ झाली आहे.