Nagpur News: संत्रा पिकात इंडो-इस्राईल तंत्रज्ञानाचा प्रभावी अवलंब करण्याच्या माध्यमातून विदर्भात संत्रा उत्पादकता वाढीचा उद्देश साधता आला आहे. त्या पार्श्‍वभूमीवर अकोला कृषी विद्यापीठाच्या या तंत्रज्ञानाचा प्रभावी प्रसार आणि अवलंब होण्याची गरज असल्याचे मत इस्रायली दूतावासातील समन्वयक ब्रम्ह देव यांनी व्यक्‍त केले.

भारतनगरस्थीत सेंटर ऑफ एक्‍सलेंसमध्ये नुकत्याच आयोजित कार्यशाळेत ते बोलत होते. भारत आणि इस्राईल यांच्या संयुक्‍त सहकार्याने संत्रा पिकाकरिता सेंटर ऑफ एक्‍सलंस प्रकल्प राबविला जात आहे. डॉ. पंजाबराव देशमुख कृषी विद्यापीठाच्या संनियंत्रणात याची अंमलबजावणी केली जात असून अनेक प्रकारचे तंत्रज्ञान संत्रा बागायतदारांकरिता उपलब्ध करुन देण्यात आले आहे.

त्यातून उत्पादकता वाढीस लागली आहे. त्याची दखल घेत हे तंत्रज्ञान लिंबूवर्गीय पीक घेणाऱ्या इतर राज्यांमध्ये प्रसारित व्हावे याकरिता कृषी विभागाच्या अधिनस्थ उद्यानविद्या अधिकाऱ्यांकरिता ही कार्यशाळा आयोजीत करण्यात आली होती.

शाखीय वाढ (कॅनॉपी) व्यवस्थापन, दहा राज्यांतील उद्यानविद्या विस्तार अधिकाऱ्यांचा समावेश होता. कुलगुरू डॉ. शरद गडाख, संशोधन संचालक डॉ. विलास खर्चे, डॉ. देवानंद पंचभाई, डॉ. प्रकाश कडू, डॉ. विलास अतकरे, संत्रा गुणवत्ता केंद्र प्रकल्प प्रमुख डॉ. विनोद राऊत, मिलिंद शेंडे, उपविभागीय कृषी अधिकारी पल्लवी देवरे यांची उपस्थिती होती.

दहा राज्यांतील अधिकारी

महाराष्ट्र, मिझोराम, हिमाचल प्रदेश, केरळ, उत्तरप्रदेश, पंजाब, हरियाणा, राजस्थान, मध्य प्रदेश, त्रिपुरा या दहा राज्यातील ३५ उद्यानविद्या अधिकारी या कार्यशाळेत सहभागी झाले आहेत.