Ratnagiri News : डॉ. बाळासाहेब सावंत कोकण कृषी विद्यापीठ, दापोली आणि सलाम किसान, प्राइम ग्रुप यांच्यात सोमवारी (ता. २८) कृषी क्षेत्रातील एक महत्त्वाचा सामंजस्य करार झाला.

या करारानुसार, दोन्ही संस्थांमध्ये कृषी क्षेत्रात तंत्रज्ञानाचा वापर करून शाश्वत शेतीच्या पद्धतीचा विकास करण्याचा संकल्प करण्यात आला आहे. या सहकार्यातील प्रमुख क्षेत्रांमध्ये पीक सल्ला, ड्रोन वापरासाठी मानक कार्यपद्धती (SoPs) विकसित करणे याचा यात समावेश आहे.

या कराराच्या निमित्ताने कुलगुरू डॉ. संजय भावे, संशोधन संचालक डॉ. पराग हल्दणकर, शिक्षण संचालक डॉ. सतीश नारखेडे, सहयोगी अधिष्ठाता (कृषी अभियांत्रिकी) डॉ. प्रशांत शहारे यांनी बोलताना नमूद केले, की या सहकार्यातून कृषी क्षेत्रात नावीन्य आणण्यासाठी आणि उत्पादनक्षमता वाढविण्यासाठी एकत्रितपणे कार्य केले जाईल. तसेच, कृषी उत्पादनांवर परिणाम करणाऱ्या कीड आणि रोगांच्या व्यवस्थापनासाठी तांत्रिक साहाय्य देखील उपलब्ध केले जाईल.

सलाम किसान, प्राइम ग्रुपच्या संस्थापिका धनश्री मानधनी आणि मुख्य कार्यकारी अधिकारी अक्षय खोब्रागडे यांनी सांगितले, की या सहकार्यातून शेतकऱ्यांना उपयुक्त माहिती आणि ड्रोनसारखी साधने आणि तंत्रज्ञान उपलब्ध करून देऊन त्यांचे जीवन अधिक समृद्ध करण्याचा आमचा उद्देश आहे.