Latur News : लातूर ः आफ्रिका-आशियायी संघटना इको फ्रेंडली बांबूचा विकास करण्यासाठी सकारात्मक आहे, अशी माहिती मुख्यमंत्री पर्यावरण आणि शाश्वत विकास कृती समितीचे कार्यकारी अध्यक्ष व राज्य कृषी मूल्य आयोगाचे अध्यक्ष पाशा पटेल यांनी दिली. नवी दिल्लीत आयोजित एका बैठकीत पटेल यांनी आफ्रिकी-आशियायी ग्रामीण विकास संघटनेचे महासचिव डॉ. मनोज नारदोसिंग यांच्यासोबत सकारात्मक चर्चा केली.

या चर्चेत महाराष्ट्रातील चालू असलेल्या बांबूवर आधारित उपक्रमांची आणि लोदगा (ता. औसा) येथे स्थापन होणाऱ्या पाशा पटेल स्किल-टेक विद्यापीठाद्वारे कौशल्य विकासाच्या आगामी योजना यावर चर्चा करण्यात आली. डॉ. नारदेवसिंग यांनी शाश्वत संसाधन म्हणून बांबू लागवडीला चालना देण्यासाठी पटेल यांच्या नेतृत्वाचे कौतुक केले. हा उपक्रम आशिया आणि आफ्रिकेतील ग्रामीण विकास आणि आर्थिक प्रगती वाढविण्याच्या उद्दिष्टाशी सुसंगत आहे.

महाराष्ट्रातील बांबू प्रकल्प हे इको-फ्रेंडली उपक्रमांचे उत्कृष्ट उदाहरण म्हणून उभे राहिले आहेत. संघटनेच्या सदस्य देशांमधील इतर देशांना प्रेरणा देऊ शकतात, असे त्यांनी यावेळी नमूद केले. आगामी पाशा पटेल स्किल-टेक विद्यापीठासोबत भागीदारीच्या प्रस्तावावर डॉ. नारदेवसिंग यांनी सकारात्मक प्रतिसाद दिला आहे.

तज्ज्ञांचा आणि संसाधनांचा वापर करून आशिया आणि आफ्रिकेतील ग्रामीण समुदायांमध्येज्ञान आणि कौशल्य विकासाला चालना देण्यासाठी सहकार्य वाढविण्याचे मत त्यांनी व्यक्त केले. हे विद्यापीठ विशेषतः बांबू-आधारित विकासासाठी युवकांना तांत्रिक आणि व्यावसायिक कौशल्य प्रदान करण्यासाठी समर्पित असेल, असेही स्पष्ट केले. या बैठकीला डॉ. एम.जे. खान, मिस लीना जेकब, रामी क्टाइशत, कार्यक्रम समन्वयक डॉ. खुश्नुद अली उपस्थित होते.