Akola News : कृषी उत्पन्न बाजार समित्यांच्या निवडणुकीचा (Akola Agriculture Produce Market Committee Election) रणसंग्राम शिगेला पोचला आहे. सोमवारी (ता.३) उमेदवारी दाखल करण्याचा शेवटचा दिवस असल्याने एकच गर्दी उसळली होती.

जिल्ह्यात प्रामुख्याने अकोला, अकोट बाजार समित्यांमधील घडामोडींवर जिल्हावासीयांचे सर्वाधिक लक्ष केंद्रित झालेले आहे. अकोल्यात सहकार पॅनेल विरुद्ध वंचित, शेतकरी जागर मंच लढत देण्याची शक्यता वर्तवली जात आहे.

सहकारात अकोला कृषी उत्पन्न बाजार समितीला (Agriculture Produce Market Committee) महत्त्वाचे स्थान आहे. या ठिकाणी सहकार पॅनेलचे वर्षानुवर्षे वर्चस्व राहिलेले आहे.

याहीवेळी पॅनेलकडून उमेदवारी अर्ज दाखल झाले आहेत. तर विरोधात वंचित बहुजन आघाडी तसेच शेतकरी जागर मंचाकडूनही काही उमेदवार रिंगणात उतरण्याची तयारी सुरू होती.

त्यानुसार काहींचे अर्ज दाखल झाले आहेत. यापुढील टप्प्यात अर्जांची छाननी तसेच उमेदवारी अर्ज मागे घेण्याची प्रक्रिया राबवली जाईल.

त्यानंतर किती जणांचे अर्ज रिंगणात शिल्लक राहतात, यावर लढत अवलंबून आहे. अकोट बाजार समितीतही या निवडणुकीत मोठे घमासान होणार आहे.

पीएचडीधारक रिंगणात

अकोला बाजार समितीत व्यापारी-अडत्या मतदार संघात पीएचडी झालेले उमेदवार रिंगणात उतरलेले आहेत. बाजार व्यवस्थेवर डॉ. महेश रमेश मुंदडा यांनी मागील वर्षी पीएचडी केली आहे.

उच्चविद्याविभूषीत उमेदवार म्हणून त्यांच्याकडे पाहिले जात आहे. त्यांच्यासोबत या मतदार संघात चंद्रकांत पाटील रिंगणात आहेत.