Jalgaon News : खानदेशात रब्बीमधील आगाप कांदा लागवडीस या आठवड्यात काही भागांत सुरुवात झाली आहे. पण मजूरटंचाईमुळे लागवड रखडत सुरू आहे. यातच यंदा लागवड वाढेल, असे चित्र आहे.

कांदा लागवडीची कार्यवाही जळगावमधील जळगाव, यावल, चोपडा, चाळीसगाव, धरणगाव, एरंडोल, जामनेर यांसह धुळ्यातील शिंदखेडा, शिरपूर, नंदुरबारातील नंदुरबार, शहादा भागात सुरू आहे. दर स्थिर असल्याने यंदा लागवड स्थिर राहील, असे सुरुवातीपासूनच सांगितले जात आहे.

मागील हंगामात उन्हाळ कांद्याची खानदेशात सुमारे ११ हजार हेक्टरवर लागवड झाली होती. मागील उन्हाळ हंगामात लागवडदेखील नोव्हेंबरच्या अखेरीस व डिसेंबर, जानेवारीत झाली होती. आता मात्र आगाप लागवड या महिन्यातच सुरू झाली आहे.

आगाप लागवड सुमारे दोन ते अडीच हजार हेक्टरवर अपेक्षित आहे. धुळ्यातील साक्री, धुळे, शिंदखेडा, जळगावातील चोपडा, यावल, जळगाव, धरणगाव या भागांत लागवड पुढील महिन्यात गती घेईल, असा अंदाज आहे. कारण या भागात डिसेंबरमध्ये लागवडीच्या दृष्टीने कांदा रोपवाटिकांची निर्मिती शेतकऱ्यांनी केली आहे.

सध्या लागवड संथ गतीने सुरू असून, सर्वत्र लागवडीला पुढे वेग येणार आहे. अनेक भागांत मजूरटंचाई असून, लागवडीसंबंधी कार्यवाही शेतकरी कशीबशी किंवा कुटुंबातील मंडळीच्या मदतीने करून घेत आहे.

लागवडीसाठी अनेक शेतकरी बाहेर गावांतून वाहतूक भाडे खर्च करून मजूर आणत आहेत. लागवडीसाठी १८० ते २०० रुपये रोज, अशी मजुरी दिली जात आहे. सलग सात ते आठ तास लागवडीसंबंधी अधिक मजुरी देऊ करीत आहेत. मजुरीचे दर विभाग किंवा क्षेत्रनिहाय वेगवेगळे आहेत.

 रोपे मुबलक

कांदा रोपांचे दरही अधिक झाले आहेत. तसेच रोपांबाबतचे परावलंबित्व लागवडीच्या कार्यवाहीत अडसर ठरते. यामुळे कमाल कांदा उत्पादकांनी आपापल्या रोपवाटिका तयार केल्या होत्या. या रोपवाटिकांतील रोपे आता पुनर्लागवडीसाठी तयार झाली आहेत.

काही शेतकऱ्यांनी रोपांची लागवड केल्यानंतर शिल्लक रोपांची विक्रीही सुरू केली आहे. रोपेही खानदेशात मुबलक आहेत. कारण रोपांचे नुकसान, रोगराई अशी समस्या रोपवाटिकांत नव्हती. अनेकांनी दर्जेदार बियाण्याचा उपयोग करून रोपवाटिका तयार केल्या होत्या.