Yavatmal News : यंदा कापसाच्या भावात स्थिरता दिसत नाही. दरात चढ-उतारच जास्त दिसत आहे. कापसाचे दर खाली आले आहेत. परिणामी अजूनही जवळपास १५ टक्के कापूसच बाजारात आला आहे. तब्बल ८५ टक्के कापूस शेतकऱ्यांनीच साठा करून ठेवला आहे. त्याचा परिणाम जिनिंग व्यवसायावर देखील झाला आहे. एकाच शिफ्टमध्ये उद्योग सुरू ठेवण्याची वेळ त्यांच्यावर आली आहे.

कापसाच्या दरात चढ-उतार सुरू आहेत. त्याचा परिणाम कापूस खरेदी-विक्रीवर दिसून येत आहे. दरात झालेली घट पाहता कापूस शेतकऱ्यांच्या घरातच आहे. गेल्या काही महिन्यांपासून कापसाचे दर आठ हजारांच्या पुढे सरकलेले नाहीत.

यंदा कापसाला दहा हजार रुपयांच्यावर दर मिळतील, अशीच चर्चा होती. त्यामुळे शेतकऱ्यांनी अजूनही कापूस विक्रीकरिता बाजारात आणलेला नाही. आतापर्यंत १५ टक्के कापसाचीच बाजारात उलाढाल झाली आहे. अजूनही जवळपास ८५ टक्के कापूस शेतकऱ्यांच्या घरातच आहे. दरवाढीच्या अपेक्षेने शेतकऱ्यांनी अजूनही कापूस विक्रीसाठी बाहेर काढलेला नाही.

कापसाला ७ हजार २०० रुपये दर मिळत होते. त्यात घसरण सुरूच आहे. सध्या कापसाचे दर ६ हजार ५०० ते ६ हजार ८०० रुपयांवर आले आहेत. कापसाचे दर सातत्याने घसरत असल्याने शेतकऱ्यांची चिंता आणखी वाढली आहे. गेल्यावर्षी हे दर दहा हजारांवर गेले होते. यंदा मात्र, स्थिती बिकट आली आहे.

गरजेपुरतीच कापसाची विक्री: दर घसरल्याने शेतकऱ्यांनी कापूस विक्री न करण्याचा निर्णय घेतला आहे. दर वाढतील, या अपेक्षेने शेतकरी कापूस विकायला तयार नाहीत. अडी-अडचणीला क्विंटल, दोन क्विंटल कापूस विकून शेतकरी आपली गरज भागवीत आहेत. दर वाढल्यास नुकसान होऊ नये, म्हणून यंदा शेतकऱ्यांनी कापूस साठवून ठेवला आहे. त्याचा परिणाम बाजारावर झाला आहे.