Satara News : सातारा जिल्ह्यातील मागील सप्ताहात झालेल्या पाऊस रब्बी हंगामाच्या दृष्टीने उपयुक्त ठरत असून पेरणीच्या कामांना गती येऊ लागली आहे. जिल्ह्यात रब्बी हंगामात ६५.९७ टक्के क्षेत्रावर पेरणी झाली आहे. दुष्काळी तालुक्यासह सर्वच तालुक्यात रब्बी ज्वारी करण्याकडे कल वाढला असून ७१ टक्के पेरणीची काम पूर्ण झाले आहे.

जिल्ह्यात रब्बी हंगामातील पेरणीच्या कामांना वेगात आला आहे. हरभरा आणि गहू पिकांची कामेही सुरू झाली आहेत. जिल्ह्यात रब्बी ज्वारीची सर्वाधिक पेरणी झाली आहे. रब्बी हंगामात रब्बी ज्वारी दरात वाढ झाल्याने ज्वारी करण्याकडे कल वाढला आहे.

पूर्वेकडील माण, खटाव, फलटण, खंडाळा, कोरेगाव तालुक्यांत एकूण पेरणीपैकी ५० टक्क्यांपेक्षा अधिक रब्बी ज्वारीची लागवड होत आहे. धान्य उत्पन्नाबरोबर चाऱ्यास ही रब्बी ज्वारी फायदेशीर ठरत आहे. त्यामुळे शेतकऱ्यांकडून पेरणी केली जात आहे. त्याचबरोबर रब्बी ज्वारीच्या कडब्यास मागणी चांगली राहत आहे.

त्यामुळे दरही समाधानकारक मिळत आहेत. मागील पाच ते सात वर्षांपासून पश्चिमेकडील बागायत तालुक्यातही रब्बी ज्वारी करण्याकडे कल वाढला आहे. टोकण पद्धतीने ज्वारी केली जात असून पाण्याची उपलब्धता असल्यामुळे दोन ते तीन पाण्याच्या पाळ्याही दिल्या जातात.

जिल्ह्यात रब्बी हंगामाचे दोन लाख १३ हजार २०९ हेक्टर सर्वसाधारण क्षेत्र असून यापैकी एक लाख ४० हजार ६४५ हेक्टर म्हणजेच ६५.९७ टक्के झाली आहे. तर रब्बी हंगामातील रब्बी ज्वारीचे एक लाख ३५ हजार ५३१ हेक्टर सर्वसाधारण क्षेत्र आहे. त्यापैकी ९७ हजार ९२ हेक्टर म्हणजेच ७१.६४ टक्के लागवड झाली आहे.