Sangli News : कोयना आणि चांदोली धरणातून यंदा सिंचनासाठी ५४ टीएमसी पाणीसाठा उपलब्ध असणार आहे. सिंचनासाठी उपलब्ध साठा शंभर टक्के उचलता येणार नाही, मात्र यंदा केवळ चारच महिने आवर्तन चालणार आहे. परिणामी, पुरून उरेल, इतके पाणी हाताशी आहे. केवळ एप्रिल-मेमध्ये आवर्तनाच्‍या फेऱ्यांमधील ताण टाळण्याचे आव्हान पाटबंधारे विभागाला पेलावे लागणार आहे.

टेंभू, ताकारी आणि म्हैसाळ उपसा सिंचन योजनांमधून शेतकऱ्यांनी अद्याप पाणी मागणी नोंदवलेली नाही. पाटबंधारे विभागाने पंप आणि कालव्यांच्या तपासणीसाठी आवर्तन चालवले आहे. फेब्रुवारीच्या सुरवातीपासून आवर्तन नियमित सुरू होतील, अशी अपेक्षा आहे. फेब्रुवारी, मार्च, एप्रिल आणि मे चारच महिने यंदा आवर्तन चालणार आहे.

चांदोली धरणातून ११.५४, तर कोयना धरणातून ४२.७० टीएमसी पाणीसाठा सिंचनासाठी उपलब्ध करण्यात आलेला आहे. यंदा तो पूर्ण क्षमतेने वापरता येणार आहे, मात्र वास्तवात पाणी शिल्लक राहील, अशी परिस्थिती आहे. परिणामी, कर्नाटक सरकारने एप्रिल-मेमध्ये मागणी केल्यास यंदा महाराष्ट्रातून पाणी उपलब्ध करून दिले जाऊ शकते, अशी स्थिती आहे.

चार महिने आवर्तन

यावर्षी फेब्रुवारी ते मे असे चार महिने आवर्तन चालेल. सध्या म्हैसाळ योजनेचे तपासणी आवर्तन सुरू करण्यात आले आहे. मात्र अद्याप शेतकऱ्यांनी मागणी नोंदवलेली नाही. मागणी अर्ज दाखल झाल्यानंतर नियमित आवर्तन सुरू करण्यात येणार आहे. गतवर्षी तब्बल आठ महिने आवर्तन सुरू होते. दुष्काळी परिस्थितीमुळे नोव्हेंबरपासून सातत्याने कालवे सुरू होते.

भारनियमनाचे संकट कमी

कोयना धरणातून केल्या जाणाऱ्या वीजनिर्मितीसाठी प्रतिवर्षी ६७.५० टीएमसी पाणीसाठा उपलब्ध केला जातो. १ जून ते ३१ मे हे वर्ष ग्राह्य मानून नियोजन केले जाते. यावर्षी पूर्ण क्षमतेने वीजनिर्मिती करणे शक्य होणार आहे. त्यामुळे यंदा उन्हाळ्यात भारनियमनाचे संकटही कमी असेल.