Latur News : विभागातील पाचही जिल्ह्यांत उन्हाळी पिकांची जवळपास ३५ हजार ३३१ हेक्टरवर पेरणी झाली आहे. पाचही जिल्ह्यांचे उन्हाळी पिकांचे सर्वसाधारण क्षेत्र ७१ हजार ७०० हेक्टर असून झालेली पेरणी सर्वसाधारण क्षेत्राच्या तुलनेत ४९ टक्के आहे.

लातूर विभागातील रब्बी हंगामाचे सरासरी क्षेत्र १३ लाख ६३ हजार ९३० हेक्टर आहे. प्रत्यक्ष १५ लाख ९२ हजार ५८६ हेक्टर म्हणजे सरासरीच्या तुलनेत ११६ टक्के क्षेत्रावर रब्बीची पेरणी झाली होती.

त्यापैकी ज्वारीची काढणी पूर्ण झाली. गव्हाची काढणी काही ठिकाणी पूर्ण तर सुरू आहे. हरभऱ्याची काढणी ७० ते ७५ टक्के पूर्ण झाली आहे. करडईचे पीक सध्या पक्वतेच्या ते काढणी अवस्थेत आहे.

पाचही जिल्ह्यांत उन्हाळी पिकाचे सर्वसाधारण क्षेत्र ७१ हजार ७०० हेक्टर असून प्रत्यक्षात ३५ हजार ३३१ हेक्टर क्षेत्रावर पेरणी झाली आहे. त्यात सर्वाधिक उन्हाळी भुईमुगाला पसंती दिली आहे. जवळपास १८ हजार ७५९ हेक्टरवर भुईमूग आहे.

या पिकाचे सर्वसाधारण क्षेत्र २६ हजार ३८८ हेक्टर आहे. झालेली पेरणी सरासरीच्या तुलनेत ७१ टक्के आहे. भुईमूग सध्या उगवणीच्या ते रोपे अवस्थेत आहे. उन्हाळी मका क्षेत्र ८०५७ हेक्टर असताना प्रत्यक्षात ४२६७ हेक्टरवर पेरणी झाली आहे. ही पेरणी ५२ टक्के आहे.

जिल्हानिहाय उन्हाळी पेरणी क्षेत्र (हेक्टर)

जिल्हा...सरासरी...प्रत्यक्ष...टक्केवारी

लातूर...२३९६...८२०...३४

धाराशिव...९५५५...९७१...१०.१६

नांदेड...२२४४१...२०२४५...९०.६६

परभणी...१०९५८.८३...२१५८...१९.६९

हिंगोली...२६३४८...११०३६.८२...४१.८९