Jalna News :पावसाळा सुरू होऊन दोन महिने उलटले आहेत. मात्र, तरीही अंबड तालुक्यातील १३८ गावांपैकी ४१ गाव, वाडी, वस्ती, तांड्यावरील तहान भागविण्यासाठी ४७ टँकरने पाणीपुरवठा सुरू आहे.

अंबड पंचायत समितीच्या गटविकास अधिकारी यांच्या मागणीवरून तहसील कार्यालयाच्या वतीने उपविभागीय अधिकारी कार्यालयाकडे टँकर व विहीर अधिग्रहणासाठी मुदतवाढ मागितली होती. विहीर, पाझर तलाव, ओढे, नदी, नाले भर पावसाळ्यात कोरडेठाक पडले आहेत. पावसाळा सुरू होऊन दोन महिने उलटत आले आहेत.

मात्र, अद्यापपर्यंत दमदार पाऊस न झाल्याने जलस्रोत कोरडेठाक आहेत. यामुळे गाव, शेतशिवारात पाण्याची तीव्र टंचाई जाणवत आहे. यामुळे ग्रामस्थ, शेतकरी, पशुपालक पुरते भयभीत आहेत. मात्र, अशा परिस्थितीमध्ये टँकर शिवाय आता पर्याय उरलेला नाही.

बनगाव, टाका, दहिगव्हाण खु., रामनगर, बनटाकळी, झिरपी, किनगाववाडी, कौचलवडी, नांदी, ढालसखेडा, रामगव्हाण, डोमेगाव, कुक्कडगाव, किनगाव, भिवंडी बोडखा, मठजळगाव, कासारवाडी, राहुवाडी, चिंचखेड, वसंतनगर, जोगेश्वरवाडी, दुधपुरी, विठ्ठलवाडी, दाढेगाव, मठतांडा, बक्षाची वाडी, मार्डी, वाघलखेडा, धनगर पिंपळगाव, पारनेर, धाकलगाव, बेलगाव, बारसवाडा, पावसेपांगरी, दोदडगाव, दुनगाव, शहापूर, रुई, पराडा, रोहिलागड याठिकाणी टँकरने पाणीपुरवठा सुरू आहे.