Latur News : थकबाकीअभावी कायमस्वरूपी वीजपुरवठा खंडित झालेल्या घरगुती, व्यावसायिक व औद्योगिक वर्गवारीतील लघुदाब आणि उच्चदाब वर्गवारीतील वीजग्राहकांसाठी ‘महावितरण’ने सुरू केलेल्या अभय योजनेचा लाभ घेण्यात धाराशिव व बीड जिल्ह्यांपेक्षा लातूरमधील थकबाकीदार ग्राहक पुढे आहेत.

या योजनेचा लातूरमधील ३३८ वीजग्राहकांनी लाभ घेतला. विशेष म्हणजे ३२८ वीजग्राहकांनी एकरकमी ४० कोटी ३३ लाख रुपयांचा भरणा केला आहे. त्यामुळे त्यांना ७ कोटी ७४ लाख रुपयांची सूट मिळाली आहे.

लातूर, धाराशिव व बीड जिल्ह्यांचा समावेश असलेल्या लातूर परिमंडलात अभय योजनेला चांगला प्रतिसाद मिळत आहे. गेल्या १२ दिवसांच्या कालावधीत लातूर परिमंडलातील तीनही जिल्ह्यातील ६३१ ग्राहकांनी १०१ कोटी ९६ लाख रुपयांचा भरणा करून योजनेत सहभाग नोंदविला आहे.

या योजनेमुळे त्यांना २९ कोटी ४७ लाख रुपयांचे व्याज आणि विलंब आकार माफ झाला असून एकरकमी बिल भरल्यामुळे अतिरिक्त ८ कोटी २९ लाखांची सूट मिळाली आहे. यातील ४० वीजग्राहकांनी ३० टक्के रक्कम भरून सहा हप्त्याने थकीत रक्कम भरण्याचा पर्याय स्वीकारला आहे. लातूर जिल्ह्यातील ३३८ वीजग्राहकांनी या योजनेचा लाभ घेतला असून ३२८ वीजग्राहकांनी एकरकमी ४० कोटी ३३ लाख रुपयांचा भरणा केला आहे.

तर धाराशिव जिल्ह्यातील १२३ वीजग्राहकांनी लाभ घेतला असून १०२ वीजग्राहकांनी एकरकमी १५ कोटी ३६ लाख रुपयांचा भरणा केल्यामुळे त्यांना ४ कोटी ९५ लाख रुपयांची सूट मिळाली आहे. बीड जिल्ह्यातील १७० वीजग्राहकांनी लाभ घेतला असून १६१ वीजग्राहकांनी एकरकमी २७ कोटी २४ लाख रुपयांचा भरणा केल्यामुळे त्यांना १२ कोटी ५३ लाख रुपयांची सूट मिळाली आहे.

लातूर परिमंडलातील ६३१ वीजग्राहकांनी १०१ कोटी ९६ लाख रक्कम भरून लाभ घेतला आहे. यांपैकी ५९१ थकबाकीदारांनी ८२ कोटी ९३ लाख रुपये एकरकमी थकबाकी जमा केल्यामुळे त्यांना अतिरिक्त १० टक्क्यासह तब्बल ३३ कोटी ५२ लाख रुपयांची व्याज व विलंब आकाराची सूट मिळाली आहे.

...अशी आहे योजना

कृषी व सार्वजनिक पुरवठा योजना वर्गवारीतील ग्राहक वगळून ३१ मार्च २०२४ पर्यंत कायमस्वरूपी वीजपुरवठा खंडित असणाऱ्या सर्व लघुदाब आणि उच्चदाब वर्गवारीतील वीज ग्राहकांसाठी ही योजना आहे. योजनेत थकबाकीमुक्त होणाऱ्या खंडित ग्राहकांना नवीन वीज जोडणीची संधी देणारी ही योजना आहे.