Pune News: राज्य शासनाने १०० दिवसांच्या कामाचे नियोजन प्रकल्पांतर्गत जमीन मोजणीची प्रकरणे गतीने निकाली काढण्याच्या सूचना दिल्या आहेत. त्यानुसार हवेली भूमी अभिलेख कार्यालयाने या प्रकल्पांतर्गत मार्च महिन्यात १ हजार २०० जमीन मोजणीची प्रकरणे निकाली काढण्यात आली आहेत, अशी माहिती हवेली भूमी अभिलेखचे उपअधीक्षक अमरसिंह पाटील यांनी दिली.

साधारणपणे याच कार्यालयात महिन्याला सरासरी ६०० जमीन मोजणीची प्रकरणे निकाली काढली जातात, मात्र, या कार्यालयाने शिस्तबद्ध काम करीत एका महिन्यात इतक्या मोठ्या प्रमाणात मोजणी प्रकरणे निकाली निघण्याची ही पहिलीच वेळ आहे. राज्यात जमीन मोजणीची सर्वाधिक प्रकरणे हवेली कार्यालयात दाखल होतात.

अर्जाची संख्या अधिक असल्याने मोजणी करण्यास विलंब होतो, या कार्यालयामध्ये दरमहा ८०० पेक्षा जास्त मोजणी प्रकरणे येत असतात. महसूल विभागाने डिसेंबर २०२४ अखेर आवक झालेल्या सर्व मोजणी प्रकरणांचा निपटारा करण्याच्या सूचना भूमी अभिलेख विभागाला दिल्या होत्या, या सर्व पार्श्‍वभूमीवर हवेली उपअधीक्षक कार्यालयाने जमीन मोजणीची प्रकरणे वेळेत निकाली काढण्यासाठी एक कृती आराखडा तयार केला.

सद्यःस्थितीत या कार्यालयामध्ये फक्त जानेवारी २०२५ नंतर प्राप्त झालेली मोजणी प्रकरणे कार्यवाही करण्यासाठी प्रलंबित आहेत. राज्य शासनाने ९० दिवसांच्या आत मोजणीची प्रकरणे पूर्ण करण्याच्या सूचना दिल्या आहेत. त्यानुसार कार्यवाही करण्यात येत आहे.