Pune News : पुणे जिल्हा सहकारी दूध उत्पादक संघास गेल्या अर्थिक वर्षात ३ कोटी रुपयांचा नफा झाला होता. त्यानुसार संघाच्या वार्षिक सर्वसाधारण सभेत करण्यात आलेल्या घोषणेनुसार दूध उत्पादकांना प्रतिलिटर १ रुपयाप्रमाणे दूध दरफरक देण्यात आला आहे.

या फरकापोटी संघाने ६ कोटी ४३ लाख रुपये जिल्ह्यातील शेतकऱ्यांच्या खात्यावर जमा केले आहेत. तसेच, या दहा दिवसांतील दूध बिलाची रक्कम ५ कोटी ८० लाख रुपयेही दूध उत्पादकांना अदा करण्यात आली आहे.

दिवाळीच्या तोंडावर जिल्ह्यातील दूध उत्पादक शेतकऱ्यांना १२ कोटी २३ लाख रुपयांची रक्कम जिल्हा दूध संघाकडून देण्यात आल्याने शेतकऱ्यांची दिवाळी गोड होणार आहे, अशी माहिती दूध संघ प्रशासनाकडून देण्यात आली.

दूध उत्पादक शेतकऱ्यांसमवेत संघातील सेवकांना ८.३३ टक्क्यांप्रमाणे १ कोटी ८२ लाख रुपयांच्या बोनसचेही वाटप करण्यात आला आहे. बाजारात कात्रजच्या दूध व दुग्धजन्य पदार्थांना मोठ्या प्रमाणात मागणी असल्यामुळे संघाच्या नफ्यात वाढ होत आहे.

दीपावलीमध्ये आपल्या प्रियजनांना भेट देण्यासाठी संघातर्फे कात्रज मिठाई गिफ्ट पॅकची शृंखला बाजारात विक्रीसाठी ठेवली आहे. मिक्स मिठाईचे विविध बॉक्स बाजारात उपलब्ध करून देण्यात आले असून मागील वर्षी दिवाळीनिमित्त कात्रज मिक्स मिठाईची ३० टन विक्री झाली होती. यावर्षी अंदाजे ५० टनांपर्यंत विक्री होऊ शकते. या दृष्टीने संघाने नियोजन केले असल्याची माहिती प्रशासनाकडून देण्यात आली.